Isuna 2018an hasitako ikerketa baten ondorio da. Zehazki, DPC batzordea urte horretan hasi zen ikertzen nola tratatzen dituen Whatsappek bere erabiltzaileen datuak, eta batez ere, zer prozedura jarraitzen duen datu horiek jabe duen Facebook enpresaren esku jartzeko. Zigorra DPCk inoiz ezarritako isunik handiena da, eta Europako pribatutasun araudi berriaren ondorioz enpresa bati jarritako bigarren handiena.

225 milioiko isuna ezartzeaz gain, agindu argi bat ere eman dio DPCk Whatsappi, erabiltzaileen datuak Europako legedia beteaz prozesa ditzan (Amazonek 746 milioi euroko isuna jaso zuen uztailean erabiltzaileen pribatutasunarekin lotutako arrazoiengatik).

Whatsappen, noski, azaldu dute ez daudela ados erabakiarekin, eta helegitea jarriko dutela, besteak beste isuna neurriz kanpokotzat jotzen dutelako. Duela urtebete, Facebookek Europan zerbitzua emateari utzi egingo ziolako mehatxua egin zuen, Europako araudi berriak eragotzi egiten baitio erabiltzaile europarren datuak Estatu Batuetako egoitza nagusira eramatea.

Irlandako batzordeak dio Whatsapp ez dela batere argia, ez erabiltzaile bakoitzaren zer informazio jasotzen duen, ezta informazio horrekin zer egiten duen azaltzeko orduan, eta beraz, urratu egiten duela Europa mailako GPDR araudiak exijitzen duen gardentasun printzipioarekin.

Informazio argirik ez dagoenez, komeni da gogoratzea, adibidez, Androideko Facebook aplikazioak erabiltzaileak bere telefonoan instalatu eta desinstalatutako aplikazio guztien zerrenda eta agendako kontaktu guztien izen-abizenak eta telefono zenbakiak biltzen dituela, izan kontaktu horiek Facebookeko erabiltzaile ala ez. Pentsatzekoa da Whatsappek ere antzeko datuak gordeko dituela, are gehiago Facebookekin gehiago integratu eta zerbitzu komertzialak eskaintzen hasi nahi duen honetan.

Whatsappetik ere irten daiteke!

Aurreko batean kontatu nizuenez, kostata, baina bere garaian Facebooketik nola, berriki Whatsappetik ere atera naiz. Eta, aizue: badakizue zer? Ez da ezertxo ere gertatzen. Kontaktu estua duzun jendeak, edo zure beharra duenak, deitu egiten dizu noizean behin… eta ez dakizue zenbat aurrezten den telefonoko baterian eta jakinarazpenetan! Bake santua, aizue!

Inspirazio gisa balio badizue, nik hiruzpalau fasetan egin dut whatsappgabetzea:

1. Aldatu erabiltzaile izena, egoera eta irudia, laster Whatsappetik irtengo nintzela adierazteko.
2. Erabili Watomattic robota tarte batez, jasotako mezu guztiei abisu batekin erantzuteko automatikoki.
3. Laga robotari kontaktu astunenak aspertzen bere mezu automatikoekin!
4. Whatsapp aplikaziotik, kontua kudeatzeko atalera joan eta kontua ezabatu. (Hau garrantzitsua da zeren, horrela egin ezean, Whatsappek jarraitzen baitu historiala gordetzen: nor saiatzen den zurekin kontaktuan jartzen, noiz, eta abar).
5. Ezabatu aplikazioa telefonotik.

Benetan, egizue proba, ez zaizue damutuko! Eta tira, damutuz gero ondo erraza da berriz ere instalatzea.

Gainera, tira, Whatsapp ez diren mezularitza zerbitzu alternatiboak ere badaude. Signal eta Telegram, besteak beste, oso txukunak dira eta, Whatsapp ez bezala, euskaraz daude!