Addameer preso palestinarren eskubideen aldeko elkarteak salatu duenez, Israelgo indar armatuek 1.319 palestinar atxilotu dituzte urtarrila eta otsaila artean. Atxilotuetatik 274 adin txikikoak dira.
Addameer-en arabera, otsailaren 28ko egunean 6.500 palestinar zeuden preso edo atxilo Israelgo kartzeletan. 6.500 presoetatik, 350 haurrak ziren.
Bestalde, kargu edo froga gabe atxilotutakoak ere badira. Urte hasieran, 169 atxilotze agindu zenbatu zituen Addameer-ek, eta otsailaren bukaerarako, froga barik atxilotu zituzten pertsona kopurua 500era igo zen.
Israelgo ziegek gertaera ilunak ezkutatzen dituzte. 1967tik, Israelgo indar armatuek 213 preso palestinar hil dituzte, horietatik 72 torturen ondorioz. Addameer-ek salatu du askotariko eskubide urraketak ematen direla kartzeletan: bortxaketak, medikamentua ukatzea, egoera txarrean dagoen janaria, kartzeletako gainpopulazioa eta abusu fisiko eta psikologikoak, besteak beste.