Iruñean,18 haur eskola publikoetatik bi baino ez dira euskaraz aritzen, eta biak Txantrea auzoan daude. Gurasoek bi eskaera egin dituzte urte luzez: D ereduan plaza gehiago ipintzea eta auzo gehiagotan barreiatzea. Matrikulazio kanpaina hasi bezperetan betikoa egin du Iruñeko Udalak, orrietan ez du hizkuntza eta auzoa aukeratzeko galderarik ipini.
Matrikulazio kanpaina martxoaren 3tik 18ra izango da eta ‘Geu ere kontuan hartzekoak gara’ lelopean, Iruñeko hainbat auzotako gurasoek betiko aldarrikapenak gogorarazi dituzte. Euskaraz, eta euren auzoan nahi dituzte haurrak, baina Udalak eskaerei erantzuteko asmo handirik ez duela uste dute. Izan ere, matrikulazio orriak banatu dituzte eta orriotan ez dute galdetzen zein hizkuntzatan nahi duten haur eskola, ezta zein auzotan nahiko luketen ere. UPNren udalaren aitzakia eskaririk ez dagoela da. Gurasoek ordea, beste behin adierazi dute matrikulazio orrietan galdetu besterik ez duela, baina horrelakorik ez dutela egiten. Bestalde, inolako eskaririk izan gabe gaztelaniaz aritzen diren haur eskola batzuetan ingelesezko jarduerak integratu dituzte. Gurasoak matrikulazio kanpaina paraleloa egiten ari dira, orrietan hizkuntza eta auzoa aukeratzeko eskatu zaie gurasoei. Emaitzak Iruñeko Udalari eramango zaizkio.
Iruñean, sare publikoan, 18 haur eskola daude. Iruñeko Udalak 13 kudeatzen ditu; bi euskaraz, lau gaztelaniaz ingelesezko jarduerekin eta zazpi gaztelaniaz. Nafarroako Gobernuak bost haur eskola kudeatzen ditu, denak gaztelaniazkoak dira.
EH Bilduk UPNren haur eskolen proposamena baztertzailetzat jo du. Batetik, beste behin, matrikulazio orrian hizkuntza aukeratzeko modua ez ipintzea kritikatu du, eta bestetik, zerbitzu horien kuotak garestiegiak direla adierazi du. Hezkuntzako gainerako zikloak bezala, haur eskola doakoa izatea eskatu du.