Berriozar, Lizarra, Lakuntza, Etxarri Aranatz eta Leitzako jaietan udalean ikurrina modu ofizialean jartzea “lege iruzurra” izan zela ebatzi du Nafarroako Justizia Auzitegi Nagusiak, ekainaren 29an Iruñeko eta Tafallako auziekin egin bezala.
Nafarroako Gobernuko EH Bildu, Geroa Bai, Ahal Dugu eta Ezkerrak epaia errespetatuko dutela adierazi dute. Hala ere, UPNren gobernualdian onartu zen Ikurren Legea datorren urte politikoan indargabetzeko konpromisoa hartu dute eta azpimarratu dute epai honek 2003tik geroztik indarrean dagoen Ikurren Legearen hutsuneak bistaratu dituela.
Adolfo Araiz EH Bilduko ordezkariak esan du nahiz eta era ofizialean ez izan ikurrina presente egongo dela jaietan. Jose Javier Esparza UPNko presidenteak, bestalde, festetan “araudia betetzea” espero duela adierazi du, eta Maria Txibite PSNko idazkari nagusiak badaudela “beste gai garrantzitsu batzuk mahai gainean”.
Bestalde, 200 bat pertsona bildu zituen ikurrinaren aldeko kontzentrazioak Iruñeko Udaletxe Plazan ekainaren 30ean.