Irun eta Hendaia arteko oinezko pasabidea ireki dute bi urteren ostean
2021eko urtarrilean itxi zuen Frantziako Gobernuak bi herrien arteko oinezko pasabidea. Erakundeek, elkarteek eta gizarte mugimenduek maiz egin dute irekitzeko eskaera, eta oraingo honetan baiezkoa eman du Frantziako Gobernuak.
Gorka Peñagarikano Goikoetxea
2023ko uztailaren 03a
Astelehenean, goizeko 6:00etan kendu dute Irun eta Hendaia arteko oinezko bidea galarazten zuen hesia. Ekintza horretan presente egon dira José Antonio Santano eta Kotte Ecenarro Irungo eta Hendaiako alkateak, Mediabask-ek jaso duenez.
Pirinio Atlantikoko prefeturari sarritan eskatu zaio bi herrien arteko oinezko pasabidea zabaltzeko, baina orain arte ezezkoa eman du. 2021eko urtarrilean itxi zena, azkenean, 2023ko uztailean zabaldu da.