Abuztuaren 31era arte egin daiteke postua jartzeko eskaera. Aurten diskoak saltzeko aukera ere egongo da, lehen aldiz. Emanaldi eta aurkezpenak iragarri dituzte antolatzaileek. Dobera euskara elkarteak antolatzen du euskara hutsezko azoka, eta orain, Doinuele Euskarazko Plazen Sarearen parte da.
Zabalik dago ostegunera arte Hernaniko Liburu eta Disko Azokan izena emateko epea, Dobera euskara elkartearen lotura honetan. Irailaren 30ean egun osoz euskara hutsezko lanak saldu eta erosteko aukera egongo da Hernaniko Atsegindegi plazan, 11:00etatik 14:30etara eta 17:00etatik 19:30etara.
Hirugarren urtez antolatu dute azoka, eta Doberak iragarri du aurten lehen aldiz diskoak ere salgai egongo direla, liburuez gain. Halaber, antolatzaileek azpimarratu dute martxoaz geroztik Doinuele Euskarazko Plazen Sarearen parte direla, Euskal Herriko beste zazpi herritako azokekin batera, euskal literatura eta musikagintza sustatzeko. ARGIA eta Baltsan elkarteak antolatzen duten Ziburuko Azoka ere Doinuelen saretuta dago.
Dobera elkarteak aurreratu duenez, liburu eta diskoen postuez gain zenbait emanaldi eta aurkezpen ere egingo dituzte, literaturarekin eta musikarekin lotutakoak. Iraileko azken astean Hernaniko Udalak eta Udal Liburutegiak antolatutako Hitz Andana jaialdia ere azokarekin amaituko da.
Postuak jartzeko eskaera, zabalik
Doberak jakinarazi duenez, ekoizle edota argitaratzaile bakoitzak gehienez bi mahai jartzeko aukera izango du, doan. Bertaratzeko aukerarik ez duten ekoizleentzat beste aukera bat jarri dute: Doberako kideek kudeatutako postuan saltzea liburu eta diskoak. Kasu horretan, salmenten %25 elkartearentzat izango da. Abuztuaren 31 baino lehen jakinarazi beharko diete interesa dutenek.