Azken egunetan egondako euri jasek kutsadura mailak gora egitea eragin dute eta horregatik erabaki du Pirinio Atlantikoetako Prefeturak hondartzak ixtea. Biarritzekoa, Bidartekoa eta Angelukoa zabaldu dituzte ostiral goizean.
Ipar Euskal Herriko 34 hondartza itxi zituzten ostegunean, kutsadura maila igo delako. Uraren analisi berriak egingo dira ostiralean eta analisien emaitzen arabera erabakiko dute hondartzak itxita mantendu behar diren edo ez.
Kutsadura maila igotzearen erantzuleak euri jasak izan dira. Euri jasak lur oso lehorretan erortzean lurrak ezin du ur guztia xurgatu eta horren ondorioz itsasora ur kutsatua heltzen da. Horrez gain, uren tratamendurako hainbat plantek gainezka egin dute eta horrek ere kutsadura ekarri du.
Uraren egoerak hobera egin duela-eta hainbat hondartza zabaldu dituzte ostiral goizean, Biarritzekoa, Bidartekoa eta Angelukoa. Hendaiatik Donibane Lohizunera arteko hondartzek itxita jarraitzen dute hala ere.