Zelata masiborako erabiltzen ziren zortzi eraikin identifikatu ditu The Intercept hedabideak. "Bijilantziari buruz azken urteetako konturik garrantzitsuena oraintxe argitaratu da, bertan argitu dute AT&T enpresa bilakatu dela interneten etsairik handiena, bere bezeroen eta zure pribatutasunaren aurka sekretuan kolaboratuz", Edward Snowdenen hitzetan.
New York, San Francisco, Chicago, Dallas, Los Angeles, Washington, Seattle eta Atlanta. Hiri hauetan dauden eraikin erraldoi, eta askotan leihorik gabekoak, zertarako erabiltzen ari diren argitaratu dute NSAren espia kabi ezkutuak AEBetako zortzi hiritan erreportajean. "Gotorlekuak diruditen AT&T enpresaren eraikin hauek NSAren monitoreo programa sekretuko gune erabakiorrak dira. Bertatik milaka milioi komunikazio eta dokumentu ikertzen dituzte, iturriek jakinarazi dutenez". Leku hauetan komunikazioak filtratu dituzte 1985etik.
Erreportajean kontatzen dutenez, 2003an NSAk internet zelatatzeko ekimen berri bat abiatu zuten FAIRVIEW izenean. Bertan, hilabete gutxian herritarren 400 mila milioi online komunikazio xurgatu zituzten. AT&T enpresak milioika email bidali dizkio NSAri astean hauek artxibatuta gordetzeko.
"Publikoki seinalatutako eraikin hauen artean, leherketa nuklear bati eutsiko lioken leihorik gabeko bat nabarmentzen da, New Yorken dagoena. Washingtonen dagoenak gotorlekua dirudi, Kapitoliotik milia erdira dagoen hormigoizko egitura; Chicagokoa West Loop Gate eremuan dago eta lurrikarei eusteko diseinatutako etxeorratza da". Atlanta, Dallas, Los Angeles, Seattle eta San Francisco. Banan bana deskribatzen dituzte eraikinak erreportajean.
Rian Gallagher eta Henrik Moltke kazetariek sinatutako informazioan bergogoratu dute mundu osoko internet informazio gehiena AEBetatik pasatzen dela sektore honetako enpresa gehienak herrialde horretan kokatuta daudelako, beste hainbat arrazoiren artean.
