Arriaga Antzokiaren aurrean elkarretaratzea egin du Manteroekin Bat plataformak, astearte arratsaldean. Mboolo Bizkaiko Manteroen Plataformak, Bizkaiko SOS Arrazakeriak eta Ongi Etorri Errefuxiatuak elkarteak osatzen dute plataforma, eta hainbat kolektibo izan dituzte alboan, kontzentrazioan. “Beste behin, indarkeriaz eta arrazakeriaz jardun dute Udaltzaingoak eta Ertzaintzak, eta hedabide batzuek ekintza horiek lagundu dituzte”. Pertsona manteroen kriminalizazioa eta haien aurkako jazarpena eta indarkeria amaitzeko eskatu dute, “Manteroen aurkako jazarpenik ez!” lelopean.

Zuzenean Bilboko Udalari zuzendu zaizkio eta pertsona manteroen eskubideei “modu larrian” eragiten dieten udal politikak aldatzeko eskatu diote. Hain justu, udal ordezkariekin bilerak izaten ari da Manteroekin Bat plataforma, eta bost eskaera dituzte oinarri. Batetik, ardura politikoa eta gehiegikerien gaineko kontrola: “Poliziaren jardunean indarkeria fisiko eta ahozkoa berehala amaitu dezala exijitzen diogu Udalari, eta botere abusua baliatzen duten polizien jarraipena, kontrola eta zigorra aplikatu ditzala”. Bigarrenik, poliziek kale saltzaileen dokumentazioa edo bestelako objektu pertsonalak hartzea oinarrizko eskubideen aurka doala gogoratu dute, praktika horrek desagertu behar duela azpimarratu dute. Berdin kale saltzaileen produktuak konfiskatzeko praktikari dagokionez: jardun eztabaidagarria eta ez oso gardena dela diote, eta berrikusi behar dela. Laugarren puntua, beste lurralde batzuetan egin den moduan, salmentarako espazio seguruak adostea, bai Aste Nagusian, bai auzoetako jaietan. Azkenik, udal kiroldegietan pertsona manteroak sartu ahal izatea eskatu dute, baldintza duinetan garbitu eta deskantsatu ahal izateko.

Bileretan, Udalaren aldetik asmo onez betetako hitzak bai, baina eskatutako neurrien inguruan inolako aurrerapenik eta keinurik ez dela egon nabarmendu du plataformak.

Mantero izatea ez baita delitu, “inor ez da ilegala” aldarrikatuz amaitu dute elkarretaratzea.