argia.eus
INPRIMATU
Ikerketa baten arabera euskarak eta naturaren balioek lotura daukate
  • Unai Pascual eta Dylan Inglisek Euskal Herriko ekialdean egin dute ikerlana, Pirinio inguruan. Euskararen eta naturaren balioen artean lotura dagoela frogatu dute.

Ixone Arana @ixonearana1 2021eko apirilaren 20a
Argazkia: Miguel Ángel García/Flickr

Hizkuntzaren aldagaia erabili dute ikerlanean eta euskararen eta basoen arteko balioetan harreman bat dagoela ondorioztatu dute. Unai Pascual Basque Centre for Climate Change-eko (BC3) ikertzailea da eta Dylan Inglis Bristolgo Unibertsitatekoa. 

Berria egunkariak dakar ikerlan honen albistea: Aezkoa, Garazi, Zaraitzu eta Zuberoako ibarretako herritarrek Irati eta Arbaileta ohianekiko duten harremana aztertu dute Pascualen eta Inglisek. Elkarrizketak eta talde eztabaidak egin dituzte bi ikertzaileek, lehentasunak kuantitatiboki ikertzeaz gain. Ehun lagun baino gehiagok hartu du parte.

Naturaren balioen eta euskararen artean bi noranzkoetako lotura dagoela frogatu dute. “Jende multzo honek esan zigun basoaz euskarazko leku izenen bidez disfrutatzea oso garrantzitsua zela”, adierazi dio Inglisek Berriari. Bestetik, natura euskal nortasunerako garrantzitsua dela azpimarratu du ikertzaileak. Naturaren balioak zabaltzeko pausuak emanda zeudela azpimarratu du baina hizkuntzari lekurik egin gabe, orain arte. 

Hizkuntza “garrantzitsua” dela tokiko naturaren identitatearentzat eta “nortasun atxikimenduarentzat”, batzuek euskara ulertu eta hitz egitearekin lotzen dute. Basque Centre for Climate Changek Pascualen hitzak jaso ditu: aurkitutako lotura hizkuntzak eta natura zaintzeko mugimenduentzako “berritzailea” izan daitekeela azpimarratu du. 

Pascualek eta Inglisek Euskal Herriko kostaldeetan edo eremu urbanoetan jarraitu nahi dute ikertzen. Bestalde, Pascualen ustetan naturaren balioak hobeto ulertzea ezinbestekoa da “bioaniztasunaren galerari aurre egiteko”.