EAEko Hezkuntza sailak ikasturtea irailaren 7an hastea aurreikusten du, ohiko formatoan, hau da, ikasle guztiak geletara aldi berean itzuliz. Hezkuntzako bost sindikatuk ohar bateratuan salatu dute planteamendu hau "arduragabea" dela eta osasun zein hezkuntzaren beharrak kontuan hartu gabe "gastu gehikuntza ekidite soila" duela helburu. Sindikatuok bilera batera deitu dute Hezkuntza Saila ekainaren 10erako.
Cristina Uriarte EAEko Hezkuntza Sailburuak hurrengo ikasturtea irailaren 7an eta "ohiko" moduan hastea espero dutela iragarri du Euskadi Irratian egindako elkarrizketan, ekainaren 4an. Maila guztietako ikasle guztiak geletara aldi berean itzultzea da gaur gaurkoz duten asmoa, eta etenda dauden hainbat zerbitzu berriz martxan jartzea, adibidez garraioa eta jangela. DBHko eta Batxilergoko ikasleek ordutegi jarraitua egingo lukete, hartara etxean bazkaltzeko. Irrati bidezko elkarrizketa horretan, zentroei ohartarazi zien "B plana" prest izan behar dutela, pandemiak berriz ere gogor joko balu berriz ere online bidezko eskolara itzultzeko.
Steilas, ELA, LAB, CCOO eta UGT sindikatuek ikasturte hasiera planteamendu hau "arduragabetzat" hartu dute: "Egin beharko litzatekena osasuna bermatuko duten neurri eraginkorrak hartuz, aurrez aurreko ikasketak berreskuratzen joateko plangintza bat landu eta plangintza hori aurrera eramateko beharrezko segurtasun neurri, baliabide, ratio murrizketa zein plantila gehikuntzak aurreikustea litzake. Hori egin beharrean, osasuna bermatzeko irizpideak, irizpide pedagogikoak zein hezkuntza sistemak dituen beharrak aintzat hartu gabe, gastu gehikuntza ekidite soilera bideratutako planteamenduak egin dituzte. Honek agerian uzten du Jaurlaritzak Hezkuntzari ematen dion balio murritza eta gure Hezkuntza sistema indartzeko eta bertan inbertitzeko asmo eskasa".
Bilerara deitu dute Hezkuntza saila ekainaren 10erako
Sindikatuek salatu dute aspalditik eskatu diotela Hezkuntza Sailari hurrengo ikasturtea elkarrekin planifikatzea: "Datorren ikasturtera begira, ikasturte hasierarako plangintza, hasiera baldintzak, osasuna bermatzeko hartu beharreko segurtasun neurriak, beharrezko plantila handitzeak... langileon ordezkariokin partekatu eta adostuak izan daitezela galdegin diogu. Gaur gaurkoz ordea, Hezkuntza Sailak ez die gure eskaerei erantzun eta datorren ikasturte hasierako baldintzak zein itzulera plan orokorra gurekin negoziatu eta adosteko bilera deialdirik ere ez dugu oraindik jaso".
Bilera egun zehatzera deitu dute Hezkuntza Saila sindikatuok: ekainaren 10ean, 11:30ean Lakuan.
Hemen irakur daiteke ohar bateratua osorik.