Hiztegi eleaniztunak egiteko makina sortu nahi du Bagera elkarteak
Hiztegi-makina sortzeko erronka abiatu du Bagera Donostiako Euskaltzaleen elkarteak. 40 hizkuntza jasoko dituzte makina horren bidez sorturiko hiztegiek. Egitasmoa Bagerak eta Donostia 2016k eskuartean duten #Euskarriak proiektuaren parte da.
Egitasmoa Tabakalerako Hirikilabs laborategian garatuko dute. (Arg: Bagera)
Hiztegiak inprimatuko dituen makina sortzeaz gain, egitasmoaren bidez pertsonak teknologikoki ahalduntzeko asmoa ere badute. Lehenik eta behin lan-talde bat sortu nahi dute, izaera irekia izango duena. Bageraren arabera, interesa izan dezakeen edonork egin dezake bat, nahiz eta ezagutza espezifikorik ez izan.
Lan saioak otsailetik martxora bitarte egingo dira, Tabakalerako Hirikilabs laborategian. Izena emateko euskarriak2016@bagera.eus helbidera idatzi behar da urtarrilaren 22a baino lehen.