Beste hiru presok jipoitu zuten pasa den ostiralean larriki gaixo dagoen euskal presoa, sostengu taldeak zabaldu duenez. Ez da Iparragirrek jasotzen duen lehen erasoa, duela hilabete batzuk Alcala-Meco espetxeko funtzionarioek jipoitu zutela salatu zuen.
Larunbatean bi lagunek bisita izan zuten Iparragirrerekin eta gertatutakoaren berri eman zien ondarrutarrak: bere ziegan zegoela, hiru preso barrura sartu ziren, hainbat objektu pertsonal lapurtu zizkioten eta ukabilkadak eman zizkioten aurpegian. Ondorioz, ahoko protesia apurtu zioten.
Duela bi aste Erizaintza Modulutik Lehen Modulura eraman zuten Iparragirre. Kartzelako terapeuta batek esan du modulu hau “desegokia” dela presoarentzat, bere gaixotasun “larri, sendaezin eta itzulezina” dela eta. Iparragirrek HIESA du C estadioan, eta ondorioz defentsak oso baxu ditu, burmuinean orban bat dauka, ikusmenaren nerbioa kalteturik dauka eta epilepsia atakeak izan ditu. Bere egoerak okerrera egin du azkenaldian, plataformak azaldu duenez.
Presoa espetxealdi arinduko erregimenera aldatzeko eskatu dute behin baino gehiagotan bere abokatuek, baina Entzutegi Nazionalak atzera bota ditu eskaerak. Iparra Galdu Baik plataformako kideek Iparragirreren muturreko egoera salatu dute eta oinarrizko giza eskubideen etengabeko urraketa pairatzen ari dela adierazi dute. Egunotan mobilizazioak deituko dituztela iragarri dute.