Gaitzaren aurkako tratamendu berria ematen ari direla ziurtatuta, itxialdia uztea erabaki dute Hepatitis C-dun gaixoek. Aurrerantzean “adi” egongo direla ohartarazi dute, “oraingo aurrerapausoak hilabete batzuen buruan ezerezean geratu ez daitezen”.
Urtarrilaren 14an hasi zuten itxialdia, Iruñeko Virgen del Carmen Ospitalean. UPNren aginduz poliziak itxialdian zeuden 30 pertsonak bota zituen biharamunean, eta sindikatuek ospitalean dituzten lokaletan jarraitu zuten protesta.
Ekintza horrekin Nafarroako Gobernuari eskatu diote hepatologoei baliabideak emateko ahalik jende gehiena sendatu dezaten, inongo mugarik gabe finantzatuz eta sendagai berriak eskuragarri jarriz.
Protesta “arrakastatsua”
Naiz.infok jaso duenez, itxialdia hasi zutenetik zazpi pertsona gehiago hasi dira tratamendua jasotzen edo horretarako data lortu dute. Atehna transplantatu eta elbarritu hepatikoen fundazioko Juan Manuel Adánek baieztatu du.
Marta Vera Nafarroako Gobernuko Osasun sailburuarekin elkartu ostean erabaki dute protesta amaitzea. Antonio Garcia Atehnako lehendakariak protesta “arrakastatsua” izan dela esan du. “Lehen gobernuak tratamendu berrirako dirurik ez zegoela esaten zuen, eta orain, aldiz, dirua jartzen ari da”.
Nafarroako Parlamentuaren aurrean elkarretaratze bat eginez amaituko dute protesta asteartean, arratsaldeko 16:00etan.