Uztailaren 6an argitaratu ditu Espainiako Carlos III. Institutuak seroprebalentziari buruzko ikerketaren hirugarren faseko emaitzak eta amaierako txostena. Test azkarren bidez neurtu dituzte herritarrek ea IgG antigorputzak zituzten, eta PCR testen bidez ea une horretan COVID-19a zuten. Haur jaio-berrietatik 90 urtetik gorako biztanleei probak egin dizkien ikerketa izan da, baina amaierako txostenak dio tamalez ezin izan dituztela hainbat sektore bereziki aztertu: adibidez zaharren egoitzetako egoiliarrak, osasun langileak eta abar.

Azken emaitza hauek jasotzeko, Hego Euskal Herriko 4.811 herritarri probak egin dizkiete ekainaren 8tik 22ra, IgG antigorputzak dituzten ikusteko. Arreta deitzen du Nafarroan egin direla proba gehienak 1.697; Bizkaian 1.277 proba egin dituzte, Gipuzkoan 1.065 eta Araban 772.

Talde immunitate txikia

Talde immunitateari dagokionez, Hego Euskal Herrian aurreko bi faseen antzeko emaitzak eman ditu azken neurketak. Arreta deitzen du Nafarroan etengabe gora egin duela IgG antigorputzak zituzten herritarren kopuruak eta gainerako herrialdeetan gora-beherak izan direla:

Araban %6,4k zituen IgG antigorputzak azken neurketan (%7,4k lehen neurketan eta %6,2k bigarrenean).

Bizkaian %3,6k zituen antigorputzak azken neurketan (%4k lehen neurketan eta %3,8k bigarrenean).

Gipuzkoan %2,5ek zituen antigorputzak azken neurketan (%2,5ek baita ere lehen neurketan eta %2,6k bigarrenean).

Nafarroan %6,6k zituen antigorputzak azken neurketan (%5,7k lehen neurketan eta %6,3k bigarrenean).

Berria-k portzentaje hauek estrapolatuta ondorio hauek atera ditu: ia 124.000 pertsona kutsatu dira Hego Euskal Herrian, ikerketa honen arabera. Nafarroan eta Bizkaian izan du eragin handiena: 43.178 eta 41.495 pertsona kutsatu ditu, hurrenez hurren. Araban 21.219 lirateke kutsatutakoak eta Gipuzkoan 18.089.

Kutsatutako kopuruak handiagoak dira ikerketa honen arabera, osasun agintariek orain arte eman dituztenak baino. Baina talde immunitatea lortzeko behar den %60ko kopurutik oso urrun daude.

IgG antigorputzak denborarekin galdu egiten dira

Ikerketa honen lehen errondan (apirilaren 27tik maiatzaren 11ra) IgG antigorputzak zituzten herritarren %7,1ek ez zituen antigorputz hauek bigarren errondarako (maiatzaren 18tik ekainaren 1era). Eta denborarekin hazi egiten da kopuru hori: hau da, lehen errondan antigorputzak zituzten herritarren %14,4k ez zuen antigorputzik hirugarren errondarako (ekainaren 8tik 22ra). Antigorputzen galera batez ere asintomatikoek izan dute (%11) eta aldiz, antigorputzen galera oso gutxik jasan du usaimena eta dastamena galdu zutenen artean (%2,6k).