Argitu dira azken eguetan bolo-bolo dabilen gaiaren ezaugarri nagusiak, Espainiako Osasun ministro Salvador Illaren eta Espainiako lehendakariorde Pablo Iglesiasen ahotik. 26tik aurrera 14 urtetik beherakoek kalera ateratzeko baimena izango dute, 09:00etatik 21:00etara bitartean, eta gehienez ordu beteko paseoak egitera. Etxetik kilometroko eremuan ibili beharko dute eta beti adinez nagusia den norbaitek lagunduta. Helduarekin batera 14 urtetik beherako hiru pertsona atera daitezke kalera.

Adin txikikoei kalean oinez zein korrika egitea baimenduko zaie, eta haiekin batera jostailuak eraman ahalko dituzte. Segurtasun neurriak betetzea eskatu du Espainiako Gobernuak; hala nola, maskara janztea, eskuak garbitzea eta beste pertsonekiko distantzia errespetatzea.

Behin neurriak zehaztuta, apirilaren 26tik aurrera hasiko liratezke txikienak kalera ateratzen, sei astez etxean itxita egon ostean Europa osoan haurren konfinamenduaren neurri gogorrenen amaiera izan da iragarpen hau. Espainiako Estatuko 8,3 milioi adingabe baino gehiagori eragin dio.

Lehen neurrien oso bestelako neurriak

"Akatsa izan da eta zuzendu egin dugu. Norbait kritikatzen dutenean eta kritikak arrazoizkoak direnean, akatsa zuzendu egin behar du, eta horixe da guk egin duguna". Pablo Iglesias lehendakariordearen hitzak dira gaurko prentsaurrekoan.

Gaur jakitera emandakoak ez dira Espainiako Gobernuak adin txikikoen konfinamendua arintzeko lehen neurriak. Asteartean oso bestelako irteerak baimendu zituen: 14 urtetik beherakoei baimendu zieten heldu batekin kalera ateratzea, baina soilik supermerkatura, banketxera eta farmaziara joateko. Proposatutako neurri horien aurrean, herritar asko eta oposizio politiko osoaren alderik kritika andana jaso zuen Sanchezen gobernuak. Zalaparta tarteko, lau orduren buruan Osasun ministro Illak agerraldia egin zuen iritziz aldatu zutela aditzera emateko.