NoMoInGlo No Monster Incinerator in Gloucestershire (Erraustegi Erraldorik Ez Gloucester eskualdean) mugimenduak zabaldu du albistea sare sozialetatik: Sid Saunders izeneko aitafamiliako gazte batek baraualdiari ekin dio GCC Gloucestershire eskualdeko gobernuaren egoitza atarian.

Saundersek lekuko prentsari aurretik adierazia zion bere ekintzaren zergatia: "Ezingo nieke gure haurrei aurpegira begiratu ziur egon gabe ahal dudan guztia egin dudala haien etorkizuna babesteko edozein aldetatik aztertuta ere zentzurik ez duen proiektu honetatik. Ez nago prest zain geratzeko ezer egin gabe, beren osasuna arriskuan jartzen duten bitartean gure diruaren erabilera oker tragiko honekin, hau da, 500 milioi libra alferrik galdutzen eta aldi berean gure inguruan zerbitzu publikoak ixten eta hondoa jotzen".

Gose grebarekin Saundersek eskatzen die agintariei alde batetik erakuts dezatela erraustegiaren kontratua herritarrek jakin dezaten diru publikoak zertan gastatzen dituzten eta bestetik segurtatu dezatela ez dutela inolako hondakin birziklagarririk erreko eta horiek ondo tratatuko dituztela, plastikoak barne. Bestalde, herritarrak ohartarazi nahi ditu hondakinak erraustearen arriskuez, GCCerakundearen sekretismo, desinformazio eta demokrazia ezaz eta herritar guztiek nork bere hondakinak murriztu, berrerabili eta birziklatzeko daukaten erantzukizunaz.

Saundersek eraikin ofizialaren sarreran kanpin denda batzuk kokatu ditu baraualdia bitartean bertan babestu eta lo egin ahal izateko, NoMoInGlo elkartearen bideo honetan ageri denez.

Gloucester eskualdean eraikitzen ari diren Javelin Park errauste planta izango da Britainia Handian daudenen artean azken denboretan zalaparta gehien sortu dutenetako bat. Inguruko herritarrak asko mugitu dira proiektuaren ibilbide osoan eta behin eraikuntza hasita gero ere segitu dute protestan.

Gloucestershireko Javelin proiektua eta eragin duen eskandaluaren funtsa zertan datzan 10 minutuko bideo honetan azaltzen du Jojo Metha idazle eta ekintzaileak: