Beste sute bat piztu da asteazkenean Moriako (Lesbos) errefuxiatuen gunean, 12.000 pertsona baino gehiago zeuden lekuan. Aurreko sutean kanpin-dendak erre ez zitzaizkien errefuxiatuak geratzen ziren bertan, baina bigarren sutearekin ihes egin behar izan dute, askok haurrak besoetan zituztela.

Garrek ke beltz handiz estali dute zerua, eta larrialdi zerbitzuetako taldeak bertaratu dira itzaltzera. Dirudienez, jendea berehalako arrisku gunetik irten den arren, ezin izan da Mitilene hiribururaino joan. Izan ere, hiriko sarrera guztiak blokeatzen dituen polizia-hesia dago bertan, koronabirusa zabaltzea saihestearen aitzakipean.

Ihes egin behar izan duten pertsonak beste milaka migratzailerekin elkartu dira, eta haientzat behin-behineko ostatu gisa karpak edota itsasontziak baliatzea espero dute. Hiru itsasontzi, ferry komertzial bat eta armadako bi ontzi Lesbosera iristea espero da, mila lagun inguru etxerik gabe geratu baitira.

Gobernuaren asmoen arabera, gainerako pertsonak Moria inguruan geratu beharko lirateke, beste uharte batzuetatik ekarritako karpetan. Asteazkeneko sutean zelaiko barrutiaren %80 suntsituta geratu zen, baina inguruko olibondo asko salbatu ahal izan dira, migratzaile gehienak bertan bizi baitziren.

COVID-19 kasuak

Zelaiak astebete zeraman berrogeialdian, errefuxiatu somaliar batek COVID-19an positibo eman ostean. Harekin harremanetan jarri ziren 35 pertsona ere isolatu egin zituzten. Greziako gobernuak emandako azalpenen arabera, agintariek pertsona horiei isolatu egin behar zituztela jakinarazi zien, eta horren ostean piztu zen sutea. Hori horrela, gobernuak nahita eragindakoa izan denaren ustea zabaldu du. Dena den, nahita eragindakoa izan bada, ez dakite nork eragin duen.

Notis Mitarakis Migrazio ministroak arratsaldean jakitera eman duenez, orain arte 35 pertsona horietatik zortzi baino ez dituzte aurkitu agintariek. Gainerakoak nahasita daude, antza, landatik ihes egin zuten gainerako herritarren artean. Mitarakisek azaldu duenez, Morian zeuden 13.000 pertsonetatik 3.500 inguru etxerik gabe geratu dira, esparru itxian zeudenak, hain zuzen ere. Gainerakoak olibondo artean sakabanatuta bizi ziren.

Lesboseko herritarren jarrera

Lesboseko bizilagunek bizkarra eman diete suteetatik ihes egin duten errefuxiatuei. Hirigunerako sarrerak itxi dituzte, migratzaileak bertara sar ez daitezen. Ez da lehen aldia irla horretan hainbat herritarrek errefuxiatuen sarrera oztopatzeko neurriak hartzen dituztela, izan ere, duela hilabete batzuk talde ultraeskuindarren presentzia nabarmendu zen bertan.