229 parlamentariren baiezkoarekin eta 64ren ezezkoarekin (sei gehiago abstenitu egin ziren) bart Greziako legebiltzarrak onartu du Europako instituzioekin uztailaren 13ko goizaldean sinatutako ituna, herrialdearen hirugarren erreskatea arautzen duen memorandum gogorra. Kontra bozkatu dutenetako 32 Alexis Tsiprasen gobernua sostengatzen duen Syrizako legebiltzarkideak dira.
Tsiprasi aurre egin dioten ezezko botoetan ezagunenak izan dira Yanis Varoufakis finantza ministro ohiarena eta honen bigarren Nadia Valavani dimititu berriarena. Aldiz, Syrizako ezkerreko blokeko buruak publikoki esan du itunarekin ados egon ez arren bere gobernua defendatzen jarraituko duela. Erreferendumean irabazi zuen ezezkoaren kontra 'Nai' (baiezkoa) defenditu zuten gehienek oniritzia eman diote itun berriari.
Une dramatikoak bizi izan dira Atenasko legebiltzarrean. Horietako hunkigarrienetakoa izan da Euklid Tsakalotosen mintzaldia: Bruselan ituna sinatzean bere bizkarren gainean bizi osorako zama hartu izana sentitzen duela, ez dagoela seguru ongi egin zuten baina beste aterabiderik ez zela.
Parlamentuan eztabaidatzen zen bitartean, iluntzean, Syntagma plazan manifestazio baketsu handia bildu zen itunaren kontra. Amaieran liskar batzuk gertatu ziren baina txikiak, Greziako krisia gertutik jarraitzen duen Paul Mason kazetari ezagunak jakinarazi duenez: "Parlamentuko atariko borroka txikia izan da, baina 15 molotov koktel bederen ikusi ditut -aurrez prestatuak- eta [poliziak] 20-30 soinu-granada jaurti ditu". "Sporadic violence" izendatu du The Guardian egunkari ingelesak, gaur prentsa handiak dakartzan irudiek baino errealitatea hobeto islatuz.
Greziak bere lehenbiziko urratsa beteta, Europako aginteak hasi dira ituna abian jartzeko urratsak ematen. Tartean, AEBko ogasun ministro Jack Lew hegazkinez heldu da Frankfurtera Europako Banku Zentralaren lehendakari Mario Draghirekin elkarrizketatzera, honek Greziako bankuei likidezia luzatu eta irekitzeko modua egin diezaien.