argia.eus
INPRIMATU
Husteko arriskuan da Greziako Vio.me fabrika autogestionatua
  • 2011n Tesalonikan dagoen Vio.Me lantegiak porrot egin ostean, Philkeram enpresako jabeek abandonatu egin zuten eta langileek hartu zuten honen kontrola.

Asier Arrate Iruskieta @AsierArrate 2015eko azaroaren 16a
Vio.Me lantegiak garbitasunerako produktuak ekoizten ditu gaur egun, baina jatorriz eraikuntzarako materialak fabrikatzen zituen.

Orduz geroztik autogestioan oinarritutako proiektua sendotu dute, baina orain lur-jotzearen ondorioz abiatutako higiezinen likidazioari egin behar diote aurre. Bere egunean Syrizak proiektua babestu bazuen ere, langileek Gobernuaren utzikeria salatu dute.

Komunikatu baten bidez langileek Syrizaren gobernuak hartutako jarrera kritikatu dute. Gogora ekarri dute lantegi autogestionatuaren proiektua babestu zuten erakunde eta alderdi politikoen artean zegoela eta Alexis Tsiprasek berak mobilizazioak babestu zituela. Gobernuan daudenetik ordea, sistema judizialak abiatutako prozesuen aurrean bakarrik utzi izana egotzi diete.

Salatu dutenez, langileen kolektiboaren aurka abiatutako prozesuaren ondorioz Gobernuak izendatutako administratzailea enkanteak antolatzen ari da lantegia dagoen lursaila saltzeko. Lau saiotan egingo da enkantea, lehena azaroaren 26an. Vio.Me dagoen lursaila saltzeak lantegiaren hustea ekar lezake.

Langileek azaldu dute enkantearen antolatzaileek lursaila hamalau partzelatan zatitu dutela, eta lantegiak kopuru osoaren zazpiren bat baino ez duela hartzen: “Lasai asko banatu ahalko zuten lantegia Philkeramen gainontzeko higiezinetatik”. Gaineratu dute lursail horietako batzuk Greziako Gobernuak eman zizkiola Vio.Me-ri lanpostuak sortzearren, eta salatu dute orain enkantean salduko direla Philkeram enpresa nagusiaren nahiak asetzeko.

Lantegia berreskuratu lanpostuak mantentzeko

Vio.Me lantegiak xaboiak eta garbitasunerako produktuak ekoizten ditu gaur egun, baina jatorriz eraikuntzarako materialak fabrikatzen zituen Philkeram enpresaren filial bat zen. 2011n porrot egin, eta jabeek lantegia abandonatu zuten.

Philkerameko batzarrak kudeaketa txarra jarri zuen lur-jotzearen arrazoi gisa. Langileek lantegiaren kontrola eskuratu zuten lanpostuak mantendu eta enpresa aurrera ateratzeko –Frantzian, Italian eta Turkian antzeko kasuak daude ARGIAko 2.360 zenbakian Pello Zubiriak azaldu zuen bezala–. Lantegiaren sistema, kudeaketa eta jarduera aldatu zituzten, baina ez dira libratu auzitegiak abiatutako likidazio prozesutik.

Nazioarteko elkartasun astea

Langileek eta Vio.Me-ren elkartasun sareak lantegia defendatzeko ekintzak antolatu dituzte. Langileek euren jarduera legeztatzeko eskatu dute. Horretarako lantegia ofizialki desjabetu eta langileei ematea eskatu dute. Bestalde, iragarri dute azaroaren 26an egingo den enkantea blokeatuko dutela ekintza zuzenen bidez.

Presio ahalmena handitu eta babesa lortzeko, nazioarteko elkarte eta norbanakoei dei egin diete azaroaren 17tik 24ra antolatu duten Nazioarteko Elkartasun Astean parte hartzeko. “Nazioarteko ekintza solidario oro ongi etorria da, batez ere, indarkeriarik gabeko ekintza zuzenak Greziako enbaxadetan”.