1962an jaiotako bilbotarrak 37 urterekin lortu zuen postua Bizkaiko Probintzia Auzitegian. Bertan presidente izatera ere heldu zen. Espainiako Auzitegi Nazionalean Baltasar Garzón ordezkatu zuen eta hura bezala, "terrorismoaren" aurkako borrokaren ikono bilakatu zen. Herriko tabernen auzian Arnaldo Otegi espetxeratzeko agindua eman zuen eta Parot Doktrina ezartzeko arazorik ez zuen izan: bederatzi euskal presori ezarri zien gerora GEEAk indargabetu zuen neurria.

Dispertsioaren alde ere agertu da; bere ustez dispertsioak ez ditu bisiten, osasun arreta jasotzeko, defentsarako, komunikaziorako edota kulturarako sarrera izateko oinarrizko eskubiderik urratzen.

“Faisan” kasuko epailea ere izan zen. Bi polizia kondenatu zituen ETAri informazioa pasa izanagatik. Halaber, YAK-42 hegazkin militarraren istripuaren kasua artxibatu zuen. Gerora berriro irekitzera behartu zuten, eta hiru hilabetetara artxibatu egin zuen bigarrenez. Militar horien senideek uste dute Grande Marlaska ministro jartzearen erabakia “maltzurra eta etsigarria” dela.