Datorren azaroaren 18an munduko 22 herrialdetan gose greba egitera deitu du Extinction Rebellion klima larrialdiaren aurkako mugimendu ekologistak. Dagoeneko ehunka pertsonak eman dute izena eta erabaki astebeteko grebaldia egingo dutela, Extinction Rebellionek webgunean argitaratu duenaren arabera.

Erresuma Batuan, plataformaren bertako taldeak politikariei gutunak helaraziko dizkie, larrialdiaren inguruan batzartzeko eskaera eginez. Gutun horiei ez badiete erantzunik ematen, gose grebara batuko direla jakinarazi dute. Extinction Rebellionek ohartarazi du: "Gizartearen gain dagoen krisi ekologikoari aurre egiteko denbora ia guztiz agortu da". Azaroaren 18ko gose grebaz gain, hilabete bereko 29an greba egiteko asmoa ere azaldu dute.