Gizon bat ito da Bakioko hondartzan
51 urteko bilbotar bat zendu da igande gauean Bakioko hondartzan. Eusko Jaurlaritzako Segurtasun Sailaren esanetan, herritar batzuek uretatik irteteko zailtasunak zituela ikusi zuten.
Mikel Eizagirre
2020ko abuztuaren 17a
Argazkia: Wikimedia Commons
Bakioko hondartzan pertsona bat ito da igandean, bainua hartzen ari zela. 20:15etan hondartzan zeuden herritar batzuek ikusi dute 51 urteko gizon bilbotarra, uretatik irten ezinik.
Lehorrera atera eta suspertze-ahaleginak egin orduko hilda zegoen gizona jada. Larrialdi zerbitzuek ere ezin izan dute haren bizitza salbatu. Gorpua Auzitegi Medikuntzako Institutura eraman dute, autopsia egiteko.