Media.cat-ek, Kataluniako Gazteriaren Kontseilu Nazionalarekin eta Bartzelonako Gazteriaren Kontseiluarekin elkarlanean, "Gazteek Kataluniako prentsa digitalean duten tratamendu mediatikoaren azterketa (2020)" txostena egin du. Ondorio nagusiak Laura Navarrok jaso ditu Media.cat-ek argitaratu berri duen 2020ko urtekarian.

Txostenaren ondorio nagusia da segurtasun ezarekin lotutako albisteak direla nagusi gazteak aipatzean, eta horretaz hitz egiteko iturri nagusia erakunde publikoak direla (albisteen %44,5).  Eta horietako askotan Poliziatik ataratako edukiak dira, jakina, gazteekiko tratamendu negatiboarekin.

Hala, gazteekin lotutako albisteen herena segurtasun ezarekin lotutakoak dira (%35,5), beste %12 kultura eta aisialdiari buruzkoa da, %10,1ak okupazioaz dihardu, %9,8 hezkuntzaz eta %8,2 parte-hartzeaz. Albiste horien herenak (%34,5) gazteak estigmatizatzen ditu, txostenaren arabera. Ondorengoak dira arrazoi nagusiak: %60 gertakari biolentoak, %10% gaitasun sozialen gabezia, %6,7 drogen kontsumoa (alkohola barne) eta %5,4 arduragabe gidatzea.

Albisteek jasotzen duten gaztearen estereotipoa gizona da, espainiar nazionalitatekoa, 18 eta 25 urte artekoa, goi mailako ikasketak ditu eta ez du gizarte mugimenduetan parte hartzen.

Media.cat urtekaria, begirada kritikoa komunikabideen isilune eta zaratei

Gai interesgarri asko bildu dute aurtengo urtekarian, ondorengo erreportajeak besteak beste: Okupazioa: alarma faltsuen uda, Madrildik independentismoa higatzeko sei modu "sortzaile", Kultura segurua, ekosistema prekarioa, Hondamendi nuklearrak saihesten dituzten mekanismo ahaztuak, Emakumeak komunikabideetan kosifikatzeko sei modu, Pandemian erditzea: haurdunen eskubideen murrizketa edo Black Lives Matter mugimendutik kazetaritzak ikasi duena.