Inkesta EAEn bizi diren eta 18 eta 35 urte bitarte dituzten 800 pertsonari egin zitzaizkien. Ikerketak argi utzi du gazteak osasun mentalaren aferatan "ahots gabe" sentitzen direla, inkestatuen %64,5ak osasun mentalaren inguruan haien iritzia entzuten ez dela sentitzen baitute. Halaber, osasun publikoaren alde azaldu dira galdekatutako ia guztiak: %87,7ak uste baitu buru osasuneko tratamenduak osasun publikoaren gain egon beharko liratekeela.

Gazteen %53ak haien osasun mentala ona dela esaten badu ere, azken urtean hiru gaztetik batek laguntza eskatu du buru osasunari lotutako arazoei aurre egiteko. Hala ere, gazteetako askok beren arazo eta kezkez hitz egiteko konfiantzazko inor ez dutela adierazten du inkestak: bakarrik sentitzen da lautik bat eta %15 abandonaturik. Txanponaren beste aldean psikologoarengana jo dutenak topatzen ditugu, horiek %21,8 dira eta %15ek, medikazioa hartu dute. Azken datu horretan nabari da genero arrakalarik handiena, emakumeek ehunekotan hamar puntuko aldea ateratzen diete gizonei; balioak %19,6 eta %10,5 baitira hurrenez hurren.

Bukatzeko, norbere buruaz beste egitearen inguruan jasotzen dira datu latzenak. 15 urte zituztenetik, EAEko 18-35 urte bitarteko pertsonen %24,5ak uneren batean bere buruaz beste egitea pentsatu du. Ehunekoak are altuagoak dira  18 eta 24 urte bitartekoen kasuan, ia hirutik batek (%30ak) suizidatzea pentsatu baitu.

Osasun mentala, ase gabeko beharra

Ez da berria sindikatuek zein gizarte mugimenduek Osakidetzatik osasun mentalean sentitu duten utzikeria. LABek duela hilabete batzuk plazaratu zuen agirian jasotzen den bezala, Europa mailan, EAE atzeko postuetan dago. "Adibide bat jartzearren, Osasunaren Mundu Erakundeak dio 100.000 biztanleko 20 psikologo behar direla, eta hemen sei baino ez ditugu".