Ostots batek esnatu zaitu. Edo beharbada ez duzu lorik hartu? Egia esan, ez du garrantzirik; insomnioa modan dago.

Jada ez dakizu zerk asaldatzen zaituen: laneko presioak, arazo pertsonalek, pandemiak… “Bizitza gogorra duk”, esango luke baten batek, eta ez litzaioke arrazoirik faltako. Zoritxarrez, ezbeharrek gure egunak hartu dituzte.

Euriaren soinua aditzen duzu, leihoko kristalaren kontra tai gabe joka. Ardi beltza bilatzeko gaua da, baina gelaren bakardadean onik zaude, bederen.

Oraindik denbora falta da alarma-hotsa entzuteko. Ohetik malguki baten antzera jauzi egin beharko duzu, ziztu bizian gosaldu eta kotxera igo bailara ilunpean zeharkatzeko.

Eguneroko joanaldia.