Etxeratek jakinarazi du Garikoitz Aspiazu euskal presoa lekualdatu dutela Lannemezango espetxetik (Frantzia) Martutenera, ostegunean. Aspiazu 2008an atzeman zuten Cauteretsen (Frantzia), eta Lannemezango kartzelan zegoen preso, Euskal Herritik 290 kilometrora. Azaroan hamasei urte beteko ditu espetxean. Presoak berak eskatu du ezarritako zigorra Euskal Herrian bete nahi duela.

Aspiazuren Euskal Herriratzearekin, bost dira Frantziako Estatuko presondegietan gelditzen diren euskal presoak: Arkaitz Agirregabiria, Iñaki Esparza, Javier Abaunza eta Mikel Karrera Lannemezanen daude preso, eta Saioa Sanchez, berriz, Reaun, Euskal Herritik 890 kilometrora.