Frantziako Estatuan nekazariek urte hauetan pizturik eduki duten gatazka handietako batek egin du jauzi Duaiko auzitegiaren epaiarekin. Izan ere, abeltzaintza industrialaren ikurretakoa bihurtua zen Ducrat herrian eraikitako behitegi itzela, frantsesez "1.000 vaches" (Mila behi) tituluan laburtu dena. Gatazkaren mamia ARGIAk 2014ko uztailean laburbildu zuen "Behiak ukuiluetan, ez esnea eta simaurra ekoizteko fabriketan" kronikan: "1.000 behi gehi 800 bigantxa gehiago aterpetuko dituen granja-fabrika erraldoia geldiarazi nahi dute Frantziako Estatuko nekazariek. Tamaina horretako bat bada, Nafarroako Caparroson. Eta Indian 40.000 behirentzakoa eraiki nahi dute multinazionalek. Nekazariek erakusten digute zer ezkutatzen duen esne merkeak".

Mundu osoan bezala, agroindustriaren proiektu berri honek ere ez zuen agintarien aldetik babesa baizik aurkitu eta azpiegitura erraldoi horren klase guztietako kalteen kontra mobilizatutako herritarrak Confederation Paysanne sindikatuak (ELB euskalduna barne duenak) eta Novissen elkarte ekologistaren inguruan bildu ziren. 2014an industrialek de facto ezarritako granja erraldoiaren legezkotasuna auzitegiek lehen epai batean berretsi zuten 2017an, baina orain apelazioan ekologistek eta nekazariek irabazi dute, Le Monde-ren kronika honetan irakur daitekeenez.

Confederation Paysanek honela baloratu du azken albistea: "Gure nahia da epaia berehala aplika dezaten eta hori izan dadila lehen urratsa bai laborantza industrialari ematen zaizkion laguntzak behingoz bukatzeko eta baita ere erabat berbideratzeko laborantza herrikoiaren aldera nekazaritza, elikadura eta lurralde antolamendua ukitzen dituzten gure politika publikoak".