Finlandiako hiru sindikatu nagusiek antolatu dituzte protestak: SAK, STTK eta Akava. Taldeok 2,2 milioi afiliatu dituzte herrialde eskandinaviarrean, populazio aktiboaren %80.

Protestaren ondorioz komertzio ugari partzialki itxita egoteaz gain, 24 orduz aktibitatea gelditu dute merkantzia portuek eta paper eta zelulosa fabrikek. Hainbat orduz garraio publikoa etenda egon da eta aireportuetan hegaldi ugari bertan behera gelditu dira.

Baso sektorearen eta teknologia industriaren galerak medio, hiru urte jarraian daramatza Finlandiak atzeraldi ekonomikoan. 2008ko krisi ekonomikoaren hasieratik, herrialdearen zor publikoa bikoiztu egin da, orain Barne Produktu Gordinaren %60 delarik.

Joan den maiatzean Sipilären koalizio liberalak hauteskundeak irabazi zituenetik, hainbat neurri aurkeztu dituzte, langileen eskubideei eragingo dietenak: funtzionarioen opor egunak 38 egunetik 30era jaitsiko dira, jai egunetan lan egiteagatik jasotzen diren ordainak murriztu egingo dira eta bajan daudenen soldata %100etik %75ra gutxituko da.