Fillonek, duela aste batzuk inkestek Juppé eta Sarkozyren atzetik ikusten zutenak, botoen %44 lortu du, Juppéren %28ren eta Sarkozyren %21en gainetik. Emaitza horiez gain, bigarren itzulira begira Sarkozyren eta Bruno Le Maire ministro ohiaren babesa lortu du, azken hau ere lehen itzulian kanpoan geratu da.
Kanpainan zehar hautagai nagusi izan den Alain Juppék bigarren itzulian parte hartzeari uko egiteko eskatu dute askok, zentro eta eskuinaren arteko banaketarik gerta ez dadin. Primarioetako hautagairik moderatuena izan da Bordeleko alkate ohia, gainontzekoen gogortasunaren aurrean. Ostegunean, elkarren arteko eztabaida egingo dute bozketen aurretik.
Garaileak aukera handiak ditu presidente bilakatzeko, apurturik dagoen ezkerraren eta bigarren itzuli batean garaipena lortzea oso zaila izango lukeen eskuin muturraren aurrean. Inkestek zentro-eskuinaren eta Marine Le Penen Fronte Nazionalaren arteko leia aurreikusten dute datorren urteko hauteskundeetarako.
Zentro eskuinaren 200.000 militanteen gehiengoa Sarkozyren aldekoa zela zioten inkestek, baina primario hauetan edonork bozka zezakeen. Lau milioi frantziarrek hartu dute parte, horien artean ezkertiarrek ere bai, alderdi aurrerakoien beherakadarekin, bigarren itzuli batean eskuin muturraren aurka egiteko hautagai moderatuago baten bila.
Fillonen programa kontserbadorea
Eskuinaren alderdi kontserbadoreenetako bat nagusitu da lehen itzulian. Fillon bikote homosexualei adopzio eskubidea kentzearen edo estatuaren mugak gogortzearen aldekoa da, eta eskuin muturraren igoeraren kontrapuntu gisa agertu da.
Bere proposamenen artean 35 orduko lan astearen amaiera dago, 39ra luzatuz. Funtzionario kopurua milioi erdira jaistea edo desenplegu laguntzen murrizketak ere proposatu ditu. Jubilatzeko adina atzeratu nahi du primarioetara aurkeztu diren hautagai gehienek bezala, egungo 62 urteetatik 65era.
Ingurumenari dagokionez, zentral nuklearren bizitza luzatzearen aldekoa da Fillon. Hezkuntzan erreformen beharra ikusten du, besteak beste, haurren derrigorrezko eskolaratzea bost urtetan kokatu nahi du eta etxeko lanak desagerrarazi
Terrorismoari aurre egiteko neurriak gogortu nahi ditu, Irak edo Siriara joaten diren frantziarrei nazionalitatea kenduz. “Poliziak kontrolatu ezin dituen” mobilizazio publikoak ere debekatu nahi ditu hautagaiak.