Igandean izan da Peruko hauteskundeen bigarren itzulia eta bost egunera bukatu dute botoen kontaketa. Bozen %50,172 lortu du Peru Libre ezkerreko hautagaitzako buru Pedro Castillok, Keiko Fujimori eskuindarra atzean utzita, 60.000 bat botoen aldearekin. Bien bitartean, ustelkeriaren aurkako fiskalzak Fujimori atxilotzeko eskatu du "baldintzapeko askatasuna urratzeagatik".
Perutarrentzat oso luzeak izan dira aste honetako bost egunak. Hauteskundeak amaitu eta hurrengo egunerako botoen gehiengoa zenbatuta bazegoen ere, bi hautagaien artean dagoen alde txikia ikusita, boto gutxi batzuek garailea alda zezaketelako edozein momentutan. Aste hasieratik gaina hartu zion Pedro Castillo ezkerreko hautagaiak Keiko Fujimori neoliberalari, gutxigatik baina. Bost egun pasata eta bozen %100 zenbatuta, tarte horri eustea lortu du Castillok eta okerrik ezean Peruko presidentea izango da.
#ONPEinforma [ACTUALIZACIÓN DE RESULTADOS] Actas contabilizadas para fórmula de presidente y vicepresidentes a las 00:50 horas del 11 de junio. pic.twitter.com/V3OTsn49YA
— ONPE (@ONPE_oficial) June 11, 2021
Halere, oraindik konpontzeko daude zenbait mahai eta akten emaitzak baligabetzeko eskaera batzuk. Beraz, emaitzetan aldaketarik izan liteke. Fujimorik berak ere iruzurra salatu zuen astelehenean bertan, Castillok berari gaina hartu ostean. 200.000 bat boto indargabetzea eskatu du eta horrek berari emango lioke garaipena. Beraz, emaitzak oraindik ez dira behin betikoak. Helegiteek, aurrera eginez gero, presidente berriaren izendapena beste bi astez atzeratuko lukete.
Fujimoritarren ustelkeria
Keiko Fujimori eskuindarrarentzat porrota are gordinagoa izan da. Hauteskundeetako emaitzak argitu bitartean, ustelkeriaren aurkako Peruko fiskaltzak Fujimori berehala atxilotzeko eskaera egin du. 30 urte arteko espetxe zigor eskaera du aurrean. Aktiboak zuritzeagatik ikertzen ari dira Fujimori, besteak beste, 2011ko eta 2016ko hauteskunde kanpainetan bere alderdiaren alde, ustez, legez kanpo jasotako diru-ekarpenen lotuta. Fiskalak azaldu duenez, ikertua izanik, Fujimorik ez ditu ezarritako arauak bete eta horregatik eskatu du bera atxilotzea.
Hala, bere aita Alberto Fujimoriren bide beretik joateko aukera zabaldu zaio. Hamar urtez Peruko presidente izan zenari ustelkeriak eta giza eskubideen urraketak ekarri zioten amaiera politikoa. Egun Limako espetxean dago, hainbat krimenengatik kondenatua izan ondoren, besteak beste, giza eskubideak urratzeagatik, ustelkeriagatik eta funtzioak usurpatzeagatik. Tartea, 2009an 25 urteko zigorra ezarri zioten gerra zikinarekin lotuta, batik bat 1990eko hamarkadan hainbat ezkertiar gerrillari bahitu eta hil izanagatik.