Ostegun goizez bildu dira Iñigo Urkullu lehendakaria eta alderdietako ordezkariak, Eusko Legebiltzarreko hauteskundeak noiz deitu aztertzeko.

Azken bilera apirilaren 30ean egin zuten, eta Urkulluk hauteskundeetarako bi epe proposatu zituen: aukeretako bat bozak uztailean egitea zen, eta bestea irailean edo urrian egitea. Oposizioko alderdiek hauteskundeetan pentsatzen jartzeko momentua ez dela helarazi zioten lehendakariari, baina honek bi asteko epea luzatu zien aukeren bueltan hausnartzeko. Jakin denez, EH Bildu eta Ahal Dugu hauteskundeak urrian deitzearen aldekoak dira. Edozelan ere, azken hitza lehendakariak berak dauka, eta hau bozak uztailean egitearen aldekoa da.

Ikuste dago gaurko bileran erabakirik hartuko duten ala ez. Hauteskundeak egiteko azken eguna urriaren 25a litzateke, eta deialdia egin ahal izateko osasun larrialdia bertan behera utzi beharko luke Urkulluk.

Urkulluren asmoa, hasiera batean, hauteskundeak apirilaren 5ean egite zen. Alabaina, martxoaren 16an bertan behera utzi behar izan zituen, ordurako pandemia egoera deklaratua baitzuen OMEk eta alarma egoera iragarria baitzeukan Espainiako Estatuak. Atzeratutako hauteskundeei data jarri nahirik dabil orain lehendakaria, eta ordurako pandemia ahulduta egongo dela iritzirik, uztailean egin nahi ditu bozak. Alabaina, uztailean osasun egoera zein izango den jakite ez da posible, eta hauteskundeak egitea posible izango dela adieraztera datorren bermerik ez da.

Eusko Legebiltzarreko hauteskundeetako 5/1990 legeak dioenez bozak hauteskundeak deitu eta 54 egunetara egin behar dira. Epe hori zuhurra izan liteke osasun larrialdi egoerarik ez dagoenerako, baina egungo egoeran nekez aurreikusi daiteke ezer 54 eguneko tartearekin.

Eusko Jaurlaritzako juristek proposatu dute hauteskundeetarako bi data ezartzea. Hala, lehen datan bozak egotea posible ez balitz, xedatutako bigarren datan egingo liratezke.