argia.eus
INPRIMATU
Euskarazko murgiltze eredua eskatu dute Iruñeko haur eskoletan
  • Iruñeko haur eskoletako ehundik gora langilek eta gurasok, hiriko barruti bakoitzean euskarazko murgiltze ereduan gutxienez lerro bat finkatzea eskatu dute hiriburuan ostegun arratsaldean egin den manifestazioan. Gaur egun murgiltze eredu bakarra dago hiri osoan haur hezkuntza publikoan.

ARGIA @argia 2021eko abenduaren 16a
Manifestazioa Txapitela kalean gora, Iruñeko Alde Zaharrean. (Argazkia: EH Gurasoak Elkartea)

Gurasoen esanetan, haur eskola publikoen eredu linguistikoen banaketa geografikoaren mapari begiratu bat besterik ez zaio egin behar euskarak eremu hauetan pairatzen duen bazterketaz ohartzeko. Hego mendebaldeko (Mendebaldea-Ermitagaña, Etxabakoitz, Iturrama eta Donibaneko auzoak) eta hego ekialdeko (Arrosadia, Lezkairu, Zabalgune, Mendillorri eta Erripagainako auzoak) biztanleek ez dute euskarazko murgiltzearen eskaintzarik: “Inork justifika dezake barruti berean lau gaztelaniazko murgiltze eredu izatea eta bakar bat ere ez euskaraz? Barruti bakoitzean behintzat murgiltze eredu bana exijitzen dugu”.

Euskarazko eskaintza, zonifikatu eta urria, eredu mistoetan eskainita dago gehien bat, eta horietan ez da murgiltze errealik ematen, gurasoek adierazi dutenez. Haien ustez, hori da eredurik egokiena “euskarak biziraun dezan eta euskaraz bizitzeko”. Salatu dute, halaber, haur hezkuntzan ez dagoela euskal adarra garatzeko planifikaziorik, “euskara profileko hezitzaile kopurua murriztu nahi dute, gero hori euskarazko plazak handitzeko ezinezko aitzakiatzat erabiltzeko”.

Ingelesaren erabilera euskararen aurka

Mobilizazioarekin bat egin duten haur eskoletako langileen ustez, ingelesa jasotzen duten ereduak ari dira baliatzen euskarazko matrikulazioak oztopatzeko: “Lehenik gaztelania eta ingelesarekin, eta ikusi zutenean hori ez zela nahiko, euskara eta ingelesa lerroak irekiz”.

Salatu dute Iruñeko Udala hamabost urte egon dela lanpostuak betetzeko deialdi publikorik egin gabe eta orain haur eskoletako langileei ingeleseko B1 titulua eskatu nahi diela, “garbi baino garbiagoa egon arren titulu hori ez dela inola ere nahikoa hizkuntza bat irakasteko”.