Iruñeko Udalari lau eskaera zehatz egin dizkiote: seme alabak euskaraz hezteko hizkuntz eskubidea bermatu dezala; berdintasun irizpideak eta kontziliaziokoak aintzat hartzeko, bizitokitik gertu dauden zentroak eskainiz; plaza kopurua emendatzeko; eta aurrematrikulazioan egindako eskaintzari hel diezaiola.

Egunero "hamarnaka kilometro" egin dituzte haur euskaldunen senideek euskaldundu daitezen, eta beraz, orain bi zentroen hizkuntza aldaketan Udalak atzera egin ezin duela deritzote. "Orain, eskaintza hori orekatzen hasia zenean, bat-batean neurri bidegabe batzuekin egin dugu topo. Gogoratu behar dugu Udalak planteatutako aldaketek familia askoren egoera arinduko dutela, baina inolaz ere ez dute gutariko askoren egoera konponduko. Izan ere, guk egiten dugun hautua, euskarazko Haur Eskola, Iruñeko lau auzotan besterik ez baita eskainiko", esan dute, prentsa ohar baten bidez.

Euskarazko haur eskolen kontrako helegitea aurkeztu dutenen egoera ere hartu dute hizpide: "Ulertzen dugu helegitea jarri duten gurasoen ezinegona, aldaketa guztiek horrelako egoerak sortzen baitituzte; eta orain, gehienez jota hamar minutuko bidaiak egin behar izateak konplikazioa eragiten ahal baitie, baina ez dugu uste helegite bat jartzerainokoa denik. Gatazken konponbiderako judizializazioaren bidearekin ez gatoz bat".

Hala, "elkartasuna" aitatu dute, bestelako bide batzuk jorratzeko asmotan. "Guztion artean enpatia eta elkartasun minimo bat izatea gustatuko litzaiguke, bidea hori dela deritzogu. Iruñeko haurren eskubideaz ari gara, eta 0-3 urteko tartean ere, hezkuntza duin bat eskatzen dugu, hizkuntza eskubideak barne. Esan  bezala, urteetako diskriminazio eta bazterkeria egoeratik gatoz eta orain, badugu bideratu eta orekatzen joateko aukera, probestu dezagun, gure hiriaren eta biztanleria osoaren onurako izango da eta".

Albiste hau Euskalerria Irratiak argitaratu du eta CC-by-sa lizentziari esker ekarri dugu ARGIAra.