Eguesibarreko EH Bilduk kritika egin zion UPNko udal gobernuari, Gabonetako programazioan euskarazko ekitaldi gutxi zirelako, eta Xuriñe Peña alkateak erantzun zion euskarazko ekitaldiak baztertzaileak direla euskaraz ez dakitenentzat.
Eguesibarreko EH Bilduk eraman zuen gaia urteko azken osoko bilkurara Axier Mesanza zinegotzia medio. Mesanzak kezka azaldu zuen Gabonetako programazio osoaren %70 gaztelaniaz aurreikusita zegoelako eta %30 euskaraz, hots, azken hizkuntza honetan bi ekitaldi.
Gainera, salatu zuen euskarazko ekitaldiak erdarazkoak baino garestiagoak zirela. Mesanzak, halaber, kritikatu zuen hainbat edukitan banatu dieten udal agendan euskararekiko dagoen desoreka, eta egoera orekatzeko udal ordenantzak betetzea eskatu zion udal gobernuari.
Ihardespenean, Eguesibarreko alkate Xuriñe Peñak (UPN) ohartarazi zuen bera euskalduna dela, baina euskarazko ekitaldiekin euskaraz ez dakitenak diskriminatzen direla. Eta horrela azaldu zuen bere burua: “Hau da, euskaraz ez dakitenek ezin dute joan euskarazko ekitaldietara, ez dituztelako ulertzen, baina gaztelaniaz egiten ditugun ekitaldietara biak joan daitezke, euskaraz dakitenak eta ez dakitenak”.
Eguesibarreko EH Bilduk X sare sozialean zabaldutako bideoan ikus daiteke Mesanzaren parte hartzea eta Peñaren erantzuna.
?? Xuriñe Peña (Alcaldesa de #Eguesibar) "Hablo Euskara (...) pero yo creo que se discrimina a la gente que no puede ir a esa actividad que no sabe Euskara. En las actividades en #Euskara, no pueden ir los de castellano porque no lo entienden..."
Video https://t.co/sbrOSP7WKV pic.twitter.com/eZz0k9Ipwi
— EH Bildu #Eguesibar (@EHBilduEguesiba) January 4, 2024
Cristina Ibarrola Iruñeko alkate ohiak eskailera garbitzaileak mespretxatu ondoren, Peñak esandakoak ere bolo-bolo dabiltza sareetan. UPN azken boladan izaten ari den beste labankadetako bat izan daiteke hau, oso agerian uzten duelako zein borondate duen euskararen sustapenarekiko, eta berez, zeharka, esaten ari delako ez dela euskarazko ekitaldirik antolatu behar, hori baztertzailea delako erdaldunekiko.
Eguesibar Zangoza Merindadeko udalerria da, Iruñearekin egiten du muga hiriaren ipar ekialdean eta kontzeju ugari hartzen ditu bere baitan. Tutera ondoren, gaur egun Nafarroako hirugarren udalerria da biztanlerian (22.121). UPNk 6 zinegotzi ditu, EH Bilduk 4, Viveguesbizi-k 3, PSNk 3, Geroa Baik 2 eta VXV herri hautagaitzak, PPk eta Zurekin Nafarroak bana. Iruñeko zentsura mozioaren ondoren, halakorik errepika daitekeen udalen artean dago, baina oraindik ez da urratsik eman norabide horretan.