ZADeko eremuan bilkurak, topaketak, tailerrak eta  festak antolatu dituzte iragan hilabetetan. Urtarrilean, aireportu proiektuaren bertan behera uztearen lehen urteurrena ospatu zuten. Azkenaldion, jabetze kolektiboaren inguruko  arlo juridikoak landu dituzte, Frantziako eta Alemaniako elkarte sare batek lagundu du zeregin horretan. Beryko kooperatiba integralak ondare irregularrei buruzko topaketak ere burutu dituzte Réseau Alternatives Forestières elkartearen eskutik.

Euskal Herritik ere ZADekiko elkartasun sarea antolatuta dago. ZADen aldeko Amankomunak sareak Euskal Herriko herritarrei deialdia luzatu die nazioarteko eremu berriak eraikitzen laguntzeko. Auzolan ekimen honen xedea etxola berriak eraikitzea da, baita hainbat egoitza berritzea ere.

Aste bateko lanaldia izanen da. Halaber eta segidan, partehartzaileek ZADen egoera eta gaur egungo jarduerak ezagutzeko parada ukanen dute apirilaren 20ko asteburuan. Interesatuek helbide honetan dituzte xehetasun guztiak, baita izena ematea ere: ehzadista@yahoo.com