Parisen Alderdi Komunistaren egunkariaren inguruan urtero antolatzen den Fête de l'Hummanité ekitalditik zabaldu da deialdia: Europako ezkerrak B plan bat antolatu eta indartu beharra dauka Europar Batasuna Greziarekin egiten ari dena berriro gerta ez dadin eta oligarkia neoliberalak kontinente mailan eman duen estatu kolpeari aurre egiteko.
"Europarako B Plan baten alde" deitu agiriaren (osorik irakurri frantsesez, ingelesez edo gaztelaniaz) sinatzaileak honako pertsonalitateok dira: Jean-Luc Mélenchon frantziarra (europarlamentarioa, Parti de Gauche alderdiaren sortzailea), Stefano Fassina italiarra (diputatua, Ekonomia eta Ogasuneko ministrorde ohia), Zoe Konstantopoulou greziarra (Greziako Legebiltzarreko lehendakaria), Oskar Lafontaine alemaniarra (Ogasun ministro ohia, Die Linkeren sortzaileetakoa) eta Yanis Varoufakis greziarra (diputatua, Ogasun ministro ohia).
Deialdian diotenez, premiazkoa da ikastea "Estatu kolpe finantziero honen lezioak. Zanpaketa ekonomiko eta politikorako tresna bilakatu du euroa Europako oligarkiak, Alemaniako gobernuaren atzean gorderik eta pozik ikusirikan nola Merkel andereak egiten dion 'lan zikin' guztia beste gobernuak egitera iristen ez direna. Europa honek ez du sortzen nazioen barruko eta nazioen arteko bortxa besterik: langabezia izugarria, dumping sozial bortitza, buruzagi alemaniarrek Hegoaldeko Europari botatzen dizkioten isekak, gero elite guztiek –Hegoaldeko eliteak barne– errepikatzen dituztenak. Europar Batasuna ari da elikatzen eskuin muturraren indartzea eta bihurtu da ondasunak ekoiztu eta banatzearen kontrol demokratikoa deuseztatzeko tresna Europa osoan".
Europako eliteek Greziaren kontra eduki dituzten bezala A plana –burua makurrarazi eta pakete neoliberal osoa irentsaraztea– eta B plana –Europatik kanporatu eta haren ekonomia suntsitzea–, sinatzaileek uste dute iritsia dena ezkerrak ere bere plana edukitzeko ordua. Honek prestaketa lan handia eskatuko du, horretarako mahaian aurkeztuta dauden arren osagai nagusietako asko. Baina "ezein nazio europarrek ezin du aurrera egin bere askapenaren alde isolamendutik. Gure ikuspegia internazionalista da".
Agirian aipatzen ez diren arren Britainia Handiko Alderdi Laboristan Jeremy Corbyn ezkertiarrak irabazita sortu diren espektatibak, idatzian diote arretaz daudela zain ea zer gertatuko den ondorengo hilabeteetan Espainian, Irlandan eta baita Grezian ere ("zergatik ez berriro" galdetzen dute), are Frantzian 2017an. "Denon artean landu behar dugu B plana, herrialde bakoitzaren ezaugarri bereziak kontutan edukiko dituena".
L'Humanitéren festan Greziatik ezkerreko joera ezberdinak egon ziren konbidaturik. B Planaren aldeko agiri honetan Syrizarekiko eta Alexis Tsiprasekiko oso kritiko diren Konstantinopoulou eta Varoufakis egon diren moduan, antolatzaile den Alderdi Komunistak Syrizako buruzagiak ere ekarri zituen ospakizunetara.