Batzordeko iturri baten arabera –albistea sinatu duten kazetariek ezkutuan gorde dute haren izena–, urte hartan automobil fabrikatzaile batek iruzurra gertatzen ari zela jakinarazi zion Antonio Tajani orduko Industria komisarioari.

Hain zuzen, Europako Batzordeko Klima eta Energia sailak Volkswageni kontuak eskatuko dizkiola jakin eta bi egunera zabaldu du WirtschaftsWoche-k albistea.

Europako Legebiltzarreko Berdeen taldeak sinadura bilketa abiarazi du, diesel autoen emisioen eskandalua Parlamentuan bertan iker dadin. “Zabaldutako azken berriek –baieztatzen badira– aditzera ematen dute Europako Batzordeko lehengo zein oraingo Industria komisarioek bazutela iruzurraren berri, baina ez entzunarena egin eta Legebiltzarrari gezur esan ziotela”.   

Ikerketa batzorde bat eskatu ahal izateko, gutxienez 188 eurodiputaturen izenpea eskuratu beharko dute. Azaroaren 19a baino lehen saiatuko dira sinadurak biltzen, egun horretantxe bilduko baita Parlmentuko Batzordeetako Presidenteen Konferentzia, besteak beste Volkswagen eskandaluari buruzko neurriez hitz egiteko.