Auzo elkarteek eta etxegabetzeen aurkako kolektiboek deituta, ehunka lagunek manifestazioa egin zuten atzo Bilbon. Goizean, Ibarrekolanda auzoko 50 urteko gizon batek bere buruaz beste egin zuen, ordezkari judizialak etxegabetze aginduarekin joan zitzaizkionean.
Gizonak bere etxeko leihotik egin zuen salto. Alokairua ordaindu ez zuela-eta joan zitzaizkion bila ordezkari judizialak, lekukoekin hitz egin zuten hedabideen arabera.
Iluntzean egindako manifestazioa amaitzean, Javier Muñoz Bizkaiko Etxegabetzeak Stop taldeko ordezkariak legedia aldatzeko eskatu zion Espainiako Gobernuari, "astean suizidio bat" gertatu ez dadin.
Bestalde, etxea ordaintzeko arazoak dituzten herritarrei eskatu die Etxegabetzeak Stop moduko taldeekin harremanetan jartzeko, babesa eta aholkularitza jaso ahal izateko.