Gipuzkoako hainbat eragile, elkarte, mugimendu eta norbanako aspaditik gabiltza erraustegiaren eraikitzeak ekarriko dituen kalteak kaleratu guran. “Pertsona helburu” duen administrazioak, herritarron ongizaterako pausoak emateaz ahaztu eta enpresa jakin batzuri, ezkutupean, kontratu basatiak oparitu dizkio (1.200 milioi euroko zorra egotzi digute gipuzkoarroi, eta hauetatik 100 miloi, debagoiendarrok ordainduko ditugu). Zer esanik ez makroproiektu honek naturari eragingo dion kalte erreparaezinaz, gune ugari dioxinaz betiko kondenatuz.
Joan den zapatuan, Zubietan, hainbat sektorek argi adierazi genuen “erraustegirik ez!” aldarria, alternatibak ditugulako, bizitza maite dugulako, natura gurea sentitzen dugulako...
Dena den, bada faltan bota genuen hotsa. Publikoki adierazi ez den arren, gure bailarako enpresa ezagun batek eskuhartze garrantzitsua izan du erraustegia eraikitzearen onarpenean. LKSk, Mondragón Taldeko kide den kooperatibak, erraustegiaren eraikitzeak ingurugiroan duen eragina aztertzen duen informe teknikoa burutu du, Diputazioak horrela eskatuta. Ondorioztatzen dena da, naturarendako jasangarria ei dela sailkatu gabeko gure zaborra erretzeko helburua duen erraustegia eraikitzea.
LKSk jasangarritzat jotzen du kutsadura ekarriko duen proiektua, kalitatezko ur emari eta lur emankorren kondena, porlanezko makroinfraestruktura saihesgarria, zaborra kudeatzeko alternatiben baztertzea, epe luzera kontaminazioa gutxitu ez, eta airearen usteltzea ahalbidetuko duen estrategia kapitalista…
Non dago Debagoieneko kooperatibismoaren posizionamendua? Erabaki garrantzitsuak ez al dira langileen artean hartzen? Zer gertatuko litzake Mondragón Taldeko kooperatibistak gaia mahaingaineratu eta herriarendako proiektu jasanezina dela aldarrikatuko balute? Akaso… hau al da bailaran nahiko genukeen errealitatea? Baserritarrok ez genuke nahiko, inondik inora. Eta horregatik, bailarako kooperatibistei zuen erabaki guneetan gai honen inguruan eztabaidatzeko gonbideta luzatzen dizuegu. Munstro hau gelditzeko aukera baldin badago, aldarria baztar guztietatik entzun dezatela.
Eutsi lurrari! Erraustegirik ez!
Baserria XXI elkarteko kideak dira.
Albiste hau Mondraberritik ekarri dugu ARGIAra