argia.eus
INPRIMATU
Espainiako Estatuak helegitea jarriko du Estrasburgoko auzitegian eta ez dute Del Rio aske uzteko asmorik
  • Espainiako Gobernuak ez du Ines del Rio presoa aske uzteko asmorik, Estrasburgoko Giza Eskubideen Epaitegiak kontrakoa adierazi arren. Hori adierazi du Barne Ministro Jorge Fernandezek. Del Riok ihes egingo lukeela argudiatu du ez aske uzteko.

2012ko uztailaren 10a
Ines del Rio presoa, Audientzia Nazionaleko epaiketan.

Epaiari helegitea jarriko diotela ere adierazi du, eta aurrera egingo ez balu eta epaiak dioen bezala, 30.000 euro ordaindu behar balizkiote, "horrek biktimei zor dien ardura zibiletik" kenduko dizkiotela adierazi du. Fernandezek esan du "penagarria" iruditzen zaiola "eta sentsibilitate falta" dela epaia gaur jakinarazi izana, ETAk Miguel Angel Blanco bahitu zuela 15 urte bete diren egunean.

Egoitza Estrasburgon duen Europako Giza Eskubideen Auzitegiak Espainiako Estatua zigortu du Ines del Rio presoari 197/2006 sententzia aplikatzeagatik. "Parot Doktrina" izenez ezagunagoa den doktrina hau Espainiako Auzitegi Gorenak onartu zuen 2006an, eta presoei zigorrak luzatzeko erabiltzen da. Presoa "eperik laburrenean" askatzeko eskatu du eta 30.000 euroko kalte ordaina eman beharko dio kalte moralengatik. Hemen irakur daiteke ebazpen osoa PDF formatuan frantsesez.

1987ko uztailaren 5ean atxilotu zuten Ines Del Rio eta 3.000 urteko kartzela zigorra ezarri zioten, beste zenbait ekintzaren artean, Madrilen 12 Guardia Zibil hiltzeagatik. 2008ko apirilean luzatu zioten kondena eta guztira 25 urte daramatza kartzelan. Del Rioren defentsak Estrasburgon helegitea jarri zuen, Europako Giza Eskubideen Hitzarmeneko 7. artikuluan oinarrituz. Bertan jasotzen da ezin dela inongo zigorrik ezarri, berau justifikatzen duen legerik ez bada.

Aho batez hartu du erabakia auzitegiak, eta azaldu du 7. artikulua (legerik gabeko zigorrik ez) eta Giza Eskubideen Hitzarmeneko 5. artikulua (askatasunerako eta segurtasunerako eskubidea) urratu dituela Espainiako Estatuak.

Lehen aldia da Estrasburgok "Parot doktrina" bezala ezaguna den kasu bati buruz epaia eman duela.

Erreakzioak

Herrira ekimenak balorazio oso positiboa egin du eta Ines Del Rio askatzeko dei egin du lehenik, eta bigarrenik, 197/2006 doktrina bertan behera uzteko eskatu du. Herritarrak zoriondu ditu urte hauetan "euskal preso politikoentzat salbuespenez bizi arteko zigorra ezartzen duen dokrtina honen aurka hainbestetan mobilizatu" direlako. Azkenik, euskal presoen eskubideen alde lanean jarraitzeko deia luzatu diote euskla jendarteari.