argia.eus
INPRIMATU
Estatu kolpea salatu du oposizioak El Salvadorren
  • Erdialdeko Amerikako herrialderik txikienean egoera politikoa tenkatzen ari da. Urtebete ere ez da Nayib Bukele, “aldaketaren presidenteak” boterea eskuratu zuela. Parlamentuan egindako proposamenak ezezkoa jaso ostean, joan den igandean, otsailaren 9an, militarrek lagunduta azaldu zen ezohiko bilkurara, oposizioa proposamena onartzera bultzatzera. Gainontzeko alderdiek “estatu kolpetzat” jo dute gertaera.

Maria Ortega Zubiate @ortegazubiate 2020ko otsailaren 11
El Salvadorreko militarrak parlamentuan.

Plan de control territorial delakoa izan da gatazka guzti honen sortzailea, herrialdeko pandillei aurre egiteko indar polizial eta militarren presentzia handitzea dakarrena. 575 milioi dolarreko aurrekontua du planak, eta 109 milioi gehiagoko proposamena egin berri du Bukelek.  Asanbladaren ezezkoa jaso du, ordea. 

Presidentea populismoaren eta millenialen pertsonifikazio gisa deskribatu dute analista ugarik. Ohiko duen eran egin dio aurre ezezko honi. Bere jarraitzaileak deitu ditu parlamentua inguratu eta oposizioa erreformaren alde bozkatzeko presiona dezaten. Horrekin nahiko ez eta militarrek ere egin dute presioa, presidentearekin parlamentura sartuz.

Astebeteko “epea” eman die oposizioko alderdiei bere proposamena onar dezaten.  Onartzen ez badute konstituzioko 87. artikulua ezartzera animatu ditu herritarrak, herri-matxinada baimentzen duena.

Bukele bere jarraitzaileei hitz egiten parlamentu kanpoan.

Oposiziotik estatu kolpe saiakera salatu dute. Daniel Reyes, FMLNko diputatuak Telesurreko elkarrizketa honetan esan duenez, “irudi hauek ez genituen ikusi diktadura militarraren garaitik. 28 urte daramatzagu, Bake Hitzarmenen ostetik, instituzio demokratikoekin. Oso momentu zailean gaude, badirudi diktadurako gobernu bat ezarri nahi dutela”.

“Aldaketaren presidentea”

Ia 30 urteko bipartidismoari amaiera eman zion Nayib Bukelek joan den urteko ekainaren 1ean.  FMLN gerrillari ohien alderdiko militante eta hiriburuko alkate izandakoa, alderditik kanporatu zuten iskanbila bat tarteko. Herrialdeko presidentziara salto egin nahi, ordea, eta derrigorrezko baldintzak betetzen ez zituen alderdi bat sortu eta desagertzen ikusi ostean, GANA izeneko koalizio eskuindarrean aurkeztu zuen bere burua. Baita irabazi ere.

5.200.000 pertsonak zeuden deituta bozkatzera. Horietatik, 1.300.000 boto eskuratu zituen, aurreko hauteskundeetan alderdi berak eskuratu zituenak baino milioi bat gehiago.  FMLN alderdiak, bere aurreko alderdiak, milioi bat boto galdu zituen.