Murtzia, Errioxa, Valentzia, Asturias edo Extremaduran baimendu dituzte bisitak, besteak beste. Izan ere, osasun sistemaren egoera larria izan bada ere, profesionalen asistentzia humanoa izan behar dela adierazi zuen pandemiaren hasieran Espainiako Bioetikako Komiteak.

Erkidego batzuk beste batzuk baino zorrotzagoak dira neurriei dagokienez, eta Murtzian pazientea ukitu badezakete ere, Extremaduran guztiz debekatuta dago. Madrilgo kasua anbiguoa da, izan ere, erkidegoak zahar etxeetan dauden gaixo larriak bisitatzeko protokoloa badu ere, osasun sailak ez du adierazi koronabirusaz gaixotutakoak ere hor sartzen diren.

Heriotza duin baten aldeko elkarteak (Derecho a Morir Dignamente, DMD gaztelaniaz) protokolo bat ezartzeak duen garrantzia azpimarratu du. Izan ere, protokolorik ez dagoen erkidegoetan osasun langilearen nahiaren arabera ematen dira agurrak; kasu batzuetan familiako kideak baimentzen ditu, baina beste kasu batzuetan pazientea hil eta gero izan dute horren berri familiako kideek.

Pertsonak bakarrik hiltzea “ankerra” dela esan du Javier Velasco DMDko presidenteak. Horregatik, protokolorik ez duten erkidegoei bat sortzea eskatu die, eta horretarako gomendioak egin, adibidez, familiako kide bat baino gehiago baimentzea seme-alaba bat baino gehiago dituzten familien kasuetan.