O Festigal jaialdian elkartu dira Euskalgintzaren Kontseilua eta katalanaren eta galizieraren aldeko hainbat erakunde eta elkarte. Bertan egin dute eskaera, eta hizkuntza gutxituen normalizazioaren aurkako “oldarraldia” gertatzen ari dela salatu dute.
Uztailaren 25ean batu dira Compostelan, Galizian, hizkuntza gutxituen aldeko hainbat erakunde, hala nola Euskalgintzaren Kontseilua, Galiziera Normalizatzeko Mahaia, Katalan Hizkuntzaren aldeko Plataforma eta Valentziako Kultur Ekintza elkartea. “Oldarraldia" salatu eta horren aurka egiteko konpromisoa hartzeaz gain, hizkuntza gutxituen gaia Espainiako Gobernua osatzeko egiten ari diren negoziazioen “erdigunean” jartzeko eskaera egin dute.
Eragile guztiek adierazi dute “oldarraldiarekiko” kezka, batez ere “oldarraldi judizialaren” partetik. Etengabe normalizazioaren bidean “oztopoak eta atzerapausoak” daudela salatu dute. Oraingo egoera politikoa “aukera” gisa ikusten dute, hizkuntza gutxituak “erdigunean jartzeko” eta “gutxieneko bermeak” eskatzeko.
Berria-k jaso ditu erakundeek mahai gainean jarri dituzten hiru eskaera: “Ezinbestekotzat” jo dute hizkuntza gutxituek beren lurraldeetan ofizialtasuna izatea; “iraulketa” egon behar da estatuko administrazio “periferikoan” eta justizia administrazioan; eta ikus-entzunezkoetan hizkuntza gutxituen presentzia handitu behar da. “Ezin da gertatu hizkuntza gutxituen eta hizkuntza eskubideen afera negoziazioetatik kanpo gelditzea beste lau urtez”, adierazi dute.
Eskuin muturraren “goraldia” ere kontuan hartu dute, eta “joera globalizatua" dela adierazi. Joera horrek hizkuntza gutxituen “kontrako jarrerak” ekartzen dituela salatu dute, eta hizkuntza gutxituen aldeko borroka “ezinbestekotzat” hartu.