El diario.es agerkariak Nazioarteko Diru Funtsak proiekzio ekonomikoei buruz egin duen txostenean entresaka egin eta Espainiako Estatuko datuak xehatu ditu. Espainiako Estatuarentzat 2020an barne produktu gordina %8 jaitsiko dela aurreikusten du eta 2021ean %4,3ko hazkundea izango luke, betiere pandemia 2020ko bigarren erdian desagertzen bada eta eusteko ahaleginak pixkanaka ezabatzen badira. Erakundeak iragarri du Espainiako Estatuan langabezia-tasa biztanleriaren %20,8raino igoko dela 2020an, eta% 17,5era jaitsiko dela 2021ean; kontsumo-prezioak %0,3 jaitsiko dira ekitaldi honetan, eta hurrengo aldian, berriz, inflazioa% 0,7 igoko da.

Euroguneko herrialdeen artean Espainiako Estatua da 2020an barne produktu gordina gehien jaitsiko duen hirugarren ekonomia, Italiak (-% 9,1) eta Greziak (-%10,0) soilik gaindituta. Nazioarteko Diru Funtsaren kalkuluen arabera, garatutako ekonomiek %6,1 egingo dute behera beren hazkundean aurten; besteak beste, Amerikako Estatu Batuak (-%5,9), Japonia (-%5,2), Kanada (-%6,2), Erresuma Batua (-%6,5), Irlanda (-%6,8), Belgika (-%6,9), Alemania (-%7,0), Austria (-%7,0), Frantzia (-%7,2), Holanda (-%7,5) eta Portugal (-%8,0). Frantziako Estatuaren datuak Espainiakoarenak baino hobexeak dira: aurten barne produktu gordina -%7,2 eta 2021ean +%4,5.

Lan-merkatuari erreparatzen badiogu, 2020an Espainia izango da Europan langabezia-tasarik altuena izango duen bigarren herrialdea. Grezia izango da aurrena % 22,3ko datuarekin, eta 2021ean %15etik gorako langabeziari eutsiko dioten bi herrialde bakarrak izango dira.