Apirilaren 8an aztertuko dute Madrilgo Gobernuak eta autonomietako ordezkariek aurtengo ikasturte amaiera nola kudeatu. Espainiako Hezkuntza sailak kontsultarako duen organu nagusia da Estatuko Eskola Kontseilua eta proposamen hauek egin dizkio asteazkeneko bileraren bezperan.
El Paisek eman du albistea. Apirilaren 7an Estatuko Eskola Kontseiluak erabaki du proposamen hauek egitea Espainiako Hezkuntza sailari, onartu duen txostenean:
Alarma egoeran etxetik egindako jarduerak ebaluagarriak izatea
Bitarteko teknologikorik ez duten familiak ebaluaziotik salbuestea proposatu du Eskola Kontseiluak
Alarma egoeran etxetik egin diren jarduerak ebaluatu ahal izatea proposatu dio Eskola Kontseiluak Espainiako Hezkuntza sailari, baina ezartzen du salbuespen garrantzitsu bat: beharrezko "bitarteko teknologikorik" ez dituzten familien kasuan, hau da, etxean internetik eta gailu digitalik ez dutenen kasuan, Eskola Kontseiluak planteatu du irakasleek jarraipen pertsonalizatua egitea ikasle horiei, egindako lanak baloratzeko.
Eskola Kontseiluak egin duen txostenean, hau dio ebaluzioari buruz: "etxean burututako hezkuntza jarduerak ebaluatu daitezela ikasleei buruzko txosten pertsonalizatuen bidez, kontuan izanik bakoitzak ezagutza sortzeko dituen baldintza teknologikoak eta konektagarritasuna (arrakala digitala ezin da ikaskuntzen eta konpetentzien ebaluazio negatiboaren kausa izan)".
Hirugarren ebaluazioan ikasleak nota positiboa ateratzen badu ikasgai batean, automatikoki aurreko biak gainditutzat ematea proposatu du
Hirugarren ebaluazioak aurreko biak errekuperatzeko balio izatea onartu du Eskola Kontseiluak, El Paisek azaldu duenez: ikasleak nota positiboa ateratzen badu ikasgai batean, automatikoki aurreko bi ebaluazioetakoak ere gainditutzat ematea, suspenditu zituenaren kasuan. Beti ere, "irakasleek egoki ikusten duten bitartean". Prozedura hau bera aplikatu ahalko litzaieke 4. DBHko ikasleei, horrela DBHko titulua eskuratu ahal izango lukete. Eta Eskola Kontseiluak eskatu du prozedura hau erabili ahal izatea Batxilergoko lehen mailan ere.
Lehen Hezkuntzan, apirila arte emandako edukien errepasoa da etxeko lanaren helburua
Kontseiluak hau onartu du Lehen Hezkuntzan etxetik eman beharreko eduki moten inguruan: berriz ere eskolak ireki zein ez, ezin dela programa akademikoetan aurrera egin eta etxeko lana zentratu behar dela apirila arte emandakoa "errepasatzen eta sakontzen". Kontseiluak dio Lehen Hezkuntzan "oso erraza izango dela hilabete hauetan ikasi ahal ezin izan dena hurrengo ikasturte hasieran gehitzea".
Bigarren Hezkuntzan eta Batxilergoan edukiekin zer egin?
Maiatzaren 5ean aztertuko du Eskola Kontseiluak zer egin selektibitateko edukiekin
Bi horietan etxetik eduki berriak ez lantzeak eragin zuzena izango luke selektibitatean ebaluatu beharreko gaietan. Maiatzaren 5ean aztertuko du Eskola Kontseiluak zer egin selektibitateko edukiekin. Oraingoz, Hezkuntza sailak eta autonomia erkidegoek adostu dute ikasturte honetako selektibitatea malguagoa izatea, hau da, garatu beharreko gaia hautatzeko gai gehiago ematea aukeran, horrela bermatzeko galdetu den gaia klasean emanda dagoela.
Ikasturtea errepikatzeari "bai, baina muturreko kasuetan"
Espainiako Estatuko Ikasleen Sindikatuak eskatu du azterketarik egin gabe ikasle guztiek ikasturtea gainditzea. Eskola Kontseiluak ez du onartu ikasleen eskaera hau, "ikasleak erlaxatu ez daitezen". Baina Kontseiluak Hezkuntza sailari egin dion gomendioa da "muturreko kasuek" baizik ez errepikatzea ikasturtea, eskolak itxi izanak ekarri duen egoera bereziaren ondorioz.
Uztailean eskolarik ez
Uztailean eskolarik ez izatea proposatu du: "Orain ez daude oporretan"
Eskolak uztailera arte atzeratzea da mahai gainean egon den aukeretako bat. Kontseiluak aukera hau baztertu du, eta proposatu du autonomiek aurtengo ikasturterako onartutako eskola egutegia mantentzea. "Kontuan hartu behar da irakasleak, ikasleak eta familiak ahalegina egiten ari direla ikasturtea jarraitzeko internet bidez; orain ez daude oporretan eta jasan behar izan duten zama psikologikoak ere eskatzen du ohiko atseden garaia" dio txostenak.
Eskola Kontseiluak Hezkuntza sailari eskatu dio zaurgarrienei baliabide teknologikoak bermatzeko
Txostenean eskatu du ikasturtea jarraitu ahal izateko beharrezko diren baliabide material eta teknologikoz hornitzeko egoera zaurgarrienean dauden ikasleak. Datu hau eman du El Paisek: Espainiako estatuan, unibertsitatekoak ez diren ikasleen %10ak ez du internetik etxean.