Kaltetuari "Tu mejor préstamo" enpresak "iruzur" egin zion orain dela zortzi urte, etxebizitza sindikatuak azaldu duenez. Mailegu enpresak 7.000 euroko mailegua jasotzeko abal gisa etxea jartzera behartu zuen emakumea, eta ez ordaintzean etxegabetze prozesu bati ekin zion.

Emakumeak salatu du instituzioek oraingoz ez diotela bizitegi-alternatibarik eskaini. Hitzezko akordio bat besterik ez duela, ez dakiela zein etxe eskaintzen dioten, eta ez duela kontraturik sinatu, Gedarrek jaso duenez.

08:00ak baino lehen bildu dira dozenaka pertsona etxegabetzea gelditzeko eta familiari babesa emateko. Polizia ere goizean goiz iritsi da eta jendea indarrez kanporatzen hasi da, Gedarrek zabaldutako bideo hauetan ikus daitekeenez.

:warning: Etxegabetzea Astrabuduan: familia bat bere etxetik bota nahian ari dira. Kaleratzeari aurre egiteko bertaratu diren pertsonak indarrez kanporatzen hasi da Ertzaintza. pic.twitter.com/4LykK7d2d6

— Gedar.eus (@GedarLangileKZ) November 12, 2024

Bi pertsona atxilo eraman dituzte. Lehenengo gaztea goizeko bederatziak aldera atxilotu dute, bigarrena, ordubete geroago. Astrabuduako Aldaieta Bidean elkartu direnenen aurka oldartzen jarraitu du Ertzaintzak.

Kargen irudi gehiago pic.twitter.com/gRv6HiLVbR

— Euskal Herriko Etxebizitza Sindikatu Sozialista (@EtxeSindikatua) November 12, 2024

Etxegabetzea gauzatzeko 10:30erako deituta zegoen segizio judiziala iritsi da, eta Ertzaintza etxeko atarira sartu da.

Iritsi dira segizio judiziala eta sarrailagilea, etxe-kaleratzea burutzeko. pic.twitter.com/XJaGJAe5aI

— Gedar.eus (@GedarLangileKZ) November 12, 2024

Etxebizitzara sartu eta ordu erdi pasatu ostean, barruan zeuden pertsonak kanporatzen hasi da Polizia. Etxebizitza Sindikatu Sozialistako kideak izan dira eraikinetik irteten lehenak.

Etxe barruan zeuden pertsonak kanporatzen hasi dira. Etxebizitza Sindikatu Sozialistako kideak botatzen ari dira lehenengo. pic.twitter.com/GehZ9ll3i6

— Gedar.eus (@GedarLangileKZ) November 12, 2024

11:40ean bota dute emakumea bere etxetik. Txalo artean jaso dute kaltetua kanpoan zeuden gazteek eta auzokideek. Uribe Kostako Etxebizitza Sindikatuak salatu du negozioak lehentasuna duela etxebizitzarako eskubidearen gainetik.

Duela sei urte mailegu enpresaren aurkako salaketa bat jarri zuen emakumeak, iruzurra leporatuta. Horren ondorioz, prozesu judizial bat ireki zen, gaur egun ere irekita jarraitzen duena. Baina enpresak etxea bereganatu ahalko du nahiz eta justiziak iruzur bat dela ebatzi.

Familia bat etxegabetu dute Astrabuduan, 70 urteko andre batek mailegu-enpresa baten iruzurra jasan ostean. Ertzaintzak emakumea bere etxetik bota du jada. pic.twitter.com/aOekUsWgbM

— Gedar.eus (@GedarLangileKZ) November 12, 2024