ACA Ingurumen Zientzien Erakundeak argitaraturiko datuen arabera, hau ez da kasu isolatua. Espainiako Estatuko etxebizitzen %21ak pobrezia energetikoarekin zerikusi zuzena duten arazoak ditu. Hego Euskal Herrian ere 242.000 –biztanleriaren %8,6– pertsonak errentaren %10 gastatzen du gutxienez energia ordaindu ahal izateko.

Etxeko tenperatura mantendu ezin dutenak %4,9 dira Hego Euskal Herrian –Espainiako Estatuan %11,1–. Espainiako Estatua Europar Batasuneko bataz bestekoaren gainetik kokaturik dago, %10,2. Hego Euskal Herrian, 121.000 pertsonak atzerapenekin ordaindu behar izan ditu argi-indarraren fakturak eta 348.200 lagunek etxean hezetasunak, itoginak edo usteldurak dituzte.

Pobrezia energetikoak osasunarekin lotura zuzena du eta ez Reusekoa bezalako ezbeharrengatik bakarrik. OMS Munduko Osasun Erakundearen arabera, neguan gertatzen diren heriotza goiztiarren %30 honekin zerikusia dute. Espainiako Estatuko zenbakiak kontuan izanik, 2014an izaniko 24.000 heriotza goiztiarretatik 7.000k lotura izango lukete pobrezia mota horrekin.

Krisi egoerak etxe askotan eragiten jarraitzen duen bitartean, elektrizitatearen prezioa %60 igo da 2008tik. Gastu mota horiei aurre egiteko laguntzen eskaerak gora egin du azken urteetan, %80 Bartzelonako probintzian adibidez. Halere, eginiko txostenaren arabera, energia edo ura ordaintzeko laguntza eskaerei uko egiten diete ahultasun egoeran dauden familien %80k, asko ez baitira zerbitzu sozialez fidatzen.

Protokolorik ez zen bete

Reusekoa bezalako kasurik gerta ez zedin, Kataluniako Parlamentuak bi lege atera zituen aurrera. Lehenengoa Konstituzio Auzitegiak atzera bota zuen, baina bigarrena indarrean dago. Legearen arabera, energia enpresek egingo dituzten horniketa mozketen berri eman behar diote administrazioari, hauek gertatu aurretik. Familia ahultasun egoeran dagoela egiaztatzen bada administrazioa gastuen kargu egin behar da. Reuseko kasuan, Gas Natural enpresak ez zuen mozketaren berririk eman eta administrazioa ez zen etxean bizi zuten egoera antzemateko gai izan.

Emakumeak bi hilabete zeramatzan argirik gabe. Horrez gain, hamar hilabetez alokairua ordaindu ezinda zebilen eta pisuaren jabearen etxegabetzeko salaketa bat zuen. Bestalde, ura ordaintzeko laguntza jasotzen zuen, beraz, bizitzen ari zen egoeraren berri izan beharko zukeen administrazioak. Izan ere, Kataluniako gobernuak funts berezia du udalek kasu hauetan esku har dezaten.

Udalak eta Kataluniako Generalitatak energia enpresari bota diote errua, bere ardura ez betetzeagatik. Hau ez da protokolo honek huts egiten duen lehen aldia. Enpresek abisurik ematen ez badute isunak jaso beharko lituzkete, baina oraingoz egin diren 195 salaketetatik hemeretzitan baino ez dira iritsi. Orain arteko kasuetan 10.000 eurora artekoak izan dira, baina oraingoan, heriotza bat tarteko, 100.000 eurokoa ere izan daitezke.

Gas Natural enpresak, berriz, Udalari egozten dio errua. Enpresak adierazi duenez emakumea ez zegoen Reuseko Udalak emaniko ahultasun egoeran dauden 88 pertsonen artean.