Iragan uztailaren 27an, Grezian, Tesalonika hirian, poliziak hiru eraikin hustu zituen. Deslojatutako hiru espazio hauek Greziak blokatuta, Europara aurrera egin ezinean, dauden milaka pertsonetako batzuk bizi zitezen berreskuratu zituen mugimendu sozialak. Etxe-hustutzeen momentuan eraikinetan zeuden pertsonek tratu ezberdindua jaso zuten: Europaz kanpoko etorkinak errefuxiatu-esparru militarizatuetara eraman zituzten eta greziarrak eta europarrak zirenak atxilotuak izan ziren. Haien artean, Zabaldi kolektibo internazionalistako bi kide. Ostegunean, urtarrilak 26, gertaera hauengatik ireki ziren hiru prozesu judizialetako bik epaiketa izanen dute, okupazioa eta eraikinari kalte materialak leporatzen direlarik.

Eraikin hauetan garatutako hiru proiektuek, Orfanotrofeio, Nikis eta Hurriya, mugen ixtea eta gobernuen xenofobia ezaugarri dituen kontestu europarrari erantzun bat ematen diote. Nikis, urtetan funtzionatzen zeraman gune soziala zen eta, egoerak bultzatua, etorkinak hartzea erabaki zuten. Orfanotrofeio, aldiz, espresuki horretarako okupatua izan zen 2015eko abenduan. Hustutzearen ondoren eraikina bota zutenean, hondakinean artean lurperatuta geratu ziren botikaren sendagaiak, janari biltegia eta bildutako material guztia. Hurriya hiruetan gazteena zen, egun batzuk besterik ez zeraman okupatua eta hamarna lagun zebiltzan konponketa eta garbiketa lanetan murgilduta. Elkarbizitza eta borroka proiektua zen, non, autogestioa oinarri, etorkinak eta bertakoak bizitzen hasiak ziren.

Banku Mundiala, Nazioarteko Diru Funtsa eta Europar Batasuna beraren eskutik Europan hamarkadetan ikusi ez dugun eraso neoliberala pairatu duen herri honek kalean borroka egin du, grebak, alternatibak eraiki, gauzak aldatzeko instituzioak irabazi eta frustrazioz beteta bete lurra nola saltzen den ikusi. Eta oraindik ere, bere herria utzi duten milaka pertsona iritsi eta Grezian blokatuak izan direnean, elkartasun eredugarriaz erantzuteko indarra atera dute. Hiru eraikin hauetan islatzen den herrien arteko elkartasuna ulertzeko moduak muzin egiten die, ez bakarrik gobernuei, baizik eta GKE handiei eta ACNUR bezalako erakundeei: pertsonen mugimendu askatasunari uko egiteko orduan konplize, kasurik onenean errefuxiatu etiketa ipini eta bizitza errespetatzen ez duten errefuxiatu-esparruetan jendea pilatzeko ezinbesteko laguntzaile, etiketa hori irabazten ez dutenak baztertu eta bigarren mailan kokatzen direlarik.

Greziar hiri ezberdinetan, pasa den udan deuseztatu zituzten hiru proiektu horien antzeko okupazio proiektuetan, bertakoen eta etorritakoen artean, erlazioak elkarlanean garatzen doaz. Batak bestea ikusi, onartu, ezagutu egiten du, etsai berdinaren aurrean elkartzen dira; esplotatzen dituztenak, gudak sortzen dituztenak, hedabideen botereaz kontrolpean eta itsu mantendu nahi gaituztenak berdinak baitira. Horizontaltasunetik, bereizten gaituzten harresi faltsuetan arrakalak irekitzen dira.  Gu salbatzaile eta haiek biktima bezala aurkezten gaituen asistentzialismoaren erabat kontrako prozesua da.

Horrek molestatzen du. Horregatik Tesalonikan helburua ez zen ia ehun ekintzaile auziperatzea, mugimendu soziala bera erasotzea baizik. Proiektu hauekin batera, hiri honetako mugimendu sozialak azken bi urtetan lehenetsitako lana suntsitu zuten. Gainera, desalojoak eta Atenaseko Pireoko kanpamendu ez ofizialaren eraispena batera egin ziren, kezko hesi moduan.

Aipatu bezala, Zabaldiko bi kide egun haietan proiektu ezberdinak bisitatzen ari ziren Tesalonikan, brigada internazionalisten prestakuntza lanen barnean, eta Hurriyako desalojoan atxilotuak izan ziren. Zabalditik salatzen dugu datorren ostegunean gertatuko den epaiketa elkartasunak jasotzen duen errepresioaren adibide bat gehiago dela. Elkartasuna gobernuek ezarritako parametroetatik irteten denean, zilegitasun osoz pertsonek bere kabuz ekiten dutenean, erasotua eta zigortua dela. Hots, Mikel eta Begoren kasua edota Askapenak jasandako jazarpena.

Elkartasuna ezin delako otzandu, aldarrikatu eta defendatu behar den ezinbesteko tresna dugu desobedientzia.

Elkartasuna ez da delitua

Zabaldi kolektiboaren izenean:

Itziar Bardaji Goikoetxea
Iñaki Molina Perez