Aurtengo ekaineko elektrizitate kontsumoa Espainiako Estatuan 2020ko ekainekoa (19.359 gigawat) baino zerbait handiagoa izan da, baina kontuan hartu behar da urte hura pandemiarena izan zela eta martxoaren 14tik ekainaren 21era arte ekonomiak geldiune handi bat izan zuela.

Sinesgaitza dirudi, baina datuak esan nahi du egungo Espainiako Estatuan eta 2004an elektrizitate kopuru bertsua kontsumitzen ari dela, noiz eta ekonomiaren hazkundea heren bat handitu denean. Estatuaren BPG bilioi euro baten azpitik zegoen 2004an eta gaur egun bilioi eta erdikoa da. Orduan, 17 milioi langile ziren Gizarte Segurantzan alta emandakoak, eta egun 21 milioi dira. Dena handitu da parametro ekonomikoetan, salbu eta kontsumitzaileen elektrizitate eskaera.

Horrek esan nahi du hazkunde ekonomiko hori nagusiki energia fosilaren gainean egiten dela, eta gizartea eta ekonomia elektrifikatzearen ahaleginak ez duela ia fruiturik eman azken 20 urteetan. Hala ere, era batera edo bestera, aurreikuspenak handiak izan behar du, antza, Estatu Espainiarrean bederen eolikoen eta eguzki energiaren eztanda berri baten aurrean gaude eta. Atzo bertan argitaratu genuen Solariak Araban egin nahi dituen eguzki-zentralak 25 direla eta ez hiru, iragarri den moduan.

Gaur egungo munduan elektrizitatetik datorren energia %20 inguru da, eta Espainiako Estatuan apur bat gehiago, 2019ko datuetan %23; alabaina, ekonomiaren %70 energia fosilen gainean eusten da. Bada ahalegin bat egungo ekonomian fosilek duten ehuneko handi hori txikitu eta elektrizitateak bete dezan, baina ez da lortzen, edo oso poliki. Egungo deskarbonizazioaren eredua, orain arteko energia bilgune handiak ordezkatzean datza, eta horretara datoz haize eta eguzki energiaren parke handi horiek.

Eredu horrek, aldiz, arazo askorekin egiten du topo, hasi ingurumen arazoetatik eta energiaren ikusmoldekoetaraino, besteak beste energia fosila erraza delako pilatzeko, baina eguzki eta haize energia ez. Horregatik, aditu askoren arabera, bada ordua beste berriztagarrien eredu bat bultzatzeko, egungo azpiegitura erraldoien eraikuntzan tematu beharrean, baina horrek, jakina, egungo eredu ekonomikoan ere aldaketa handiak eskatuko lituzke.

Energias Renovables-es agerkari digitalean azaltzen dira Espainiako Estatuko azken 20 urteetako ekaineko elektrizitate kontsumoen bilakaera.